ھاتە راگھاندن کو حکوومەتا عەرەبستانا سعوودی بریار دا کو حەتا دوماهیا سالا پەروەردەیێ یا 2020-2021ێ 8 قۆتابخانەیێن ترکیێ یێن گرێدایی وەزارەتا پەروەردەیا نەتەوی یا ترکیێ و ل پایتەختا سعوودیێ و پارێزگەھێن دی کار دکەن بگریت.
ل گۆر نووچەیا ئاژانسا فەرمی یا ترکیێ “ئانادۆل”ێ، کو زانیاری ژ چاڤکانیەکێ دیپلۆماسی ب دەست خستنە وەزارەتا پەروەردەیا عەرەبستانا سعوودی ژ قۆتابخانەیێن گرێدایی وەزارەتا پەروەردەیا نەتەوەیی یا ترکیێ یێن ل تەبووک، ریاز، تایف و جەددەیێ ب نڤیسارەکێ بریارا گرتنێ شاندیە.
ھاتە زانین کو رایەدارێن عەرەبستانا سعوودی سەرەدانا قۆتابخانێن ترکی یێن ل باژێرێن دامام و ئابھایێ ژی کرن و ب دەڤکی بریارا گرتنێ ژ وان را راگھاندن.
ل گۆر زانیاریان دێ قۆتابخانەیێن ل مەککە و مەدینەیێ ژی ب ھەمان ئاوایی هێنە گرتن.
پسپۆر د وێ باوەریێ دا نە کو ئەڤ کارێ ریازێ دکاریت جارەکا دی ببیتە سەدەما ئالۆزیا د ناڤبەرا ترکیا و عەرەبستانا سعوودی دا.
ئالۆزیێن د ناڤبەرا ئەنقەرە و ریازێ دا ژ سالا 2017ێ و هێڤە زێدە بوون، ب تایبەتی پشتی پشتگریا ترکیا ژ بۆی قەتەرێ کو د بن دۆرپێچا سعوودیێ دا بوو، هەر وەها ب کوشتنا رۆژنامەڤانێ رەخنەگرێ سعوودی جەمال خاشقچی ل کۆنسۆلخانەیا عەرەبستانا سعوودی ل ستەنبۆلێ ئەڤ ئالۆزیە گەهشتن گۆپیتکێ.
