سەرۆکاتیا پەرلەمانێ کوردستانێ ئێریشا ل سەر ھێزێن پێشمەرگە ب توندی شەرمەزار کر 

سەرۆکاتیا پەرلەمانێ کوردستانێ د داخویانیەکێ دا ئێریشا شەڤا بۆری یا داعشێ ل سەر ھێزێن پێشمەرگە ب توندی شەرمەزار کر.

سەرۆکاتیا پەرلەمانێ کوردستانێ د داخویانیەکێ دا ئێریشا شەڤا بۆری یا داعشێ ل سەر ھێزێن پێشمەرگە ب توندی شەرمەزار کر و راگھاند، دوبارەبوونا ئێریشێن ب ڤی رەنگی، وێ راستیێ پشتراست دکەت کو دڤێت زووتر ھەولێر و بەغدا ل سەر برێڤەبەرنا ناڤچەیێن کوردستانی رێک بکەڤن و چارەنڤیسا ناڤچەیێن کوردستانی ژی ل گۆر مادەیا 140یا دەستووری چارەسەر ببیت.

سەرۆکاتیا پەرلەمانێ کوردستانێ د داخویانیا خوە دا گۆت: “شەڤا بۆری دیسا تاریپەرەستێن داعشێ ل میحوەرێ پردێ ئێریشی سەر ھێزێن پێشمەرگەیێن کوردستانێ کرن و د ئەنجام دا مخابن چەند پێشمەرگە شەھید و بریندار بوون و ھێزێن پێشمەرگەیێن کوردستانێ ژی وەک ھەر جار ژ بۆ پاراستنا گەل و ئاخا کوردستانێ ژ ھەر جورە ئێریش و دەستدرێژی، وێرەکی و قوربانیێن خوە دوبارە کرن”.

سەرۆکاتیا پەرلەمانێ کوردستانێ تەکەز دکەت “دوبارەبوونا ئێریشێن ب ڤی رەنگی، وێ راستیێ پشتراست دکەت کو دڤێت ھەولێر و بەغدا زووتر ل سەر رێڤەبەرنا ناڤچەیێن کوردستانی رێکەفتنێ بکەن و چارەنڤیسا ناڤچەیێن کوردستانی ژی ل گۆر مادەیا 140یا دەستووری چارەسەر ببیت، ھەر وەک پێویستە ھێزێن ھەڤپەیمانان ل ھەرێما کوردستانێ و ئیراقێ بمینن و ھەڤکاری و پەروەردەکرنا ھێزێن پێشمەرگە بکەن ژ بۆ کو مەترسیا تەرۆریستان ب داوی بینن و رێ ل بەر دەرکەتنا رێخستنا تەرۆریستێن داعش و ھەڤپەیمانێن وان بگریت کو ھەردەم ل سەر ھەرێما کوردستانێ و ئیراقێ و جیھانێ گەفن”.

د بەشەکێ دی یا داخویانیێ دا دبێژیت: “ئەم ب ناڤێ پەرلەمانێ کوردستانێ ب توندی ئێرشا سەر سەنگەرێن ھێزێن پێشمەرگەیێن کوردستانێ ژ لایێ دەستێن چەپەلێن داعشێ ڤە ل پردێ شەرمەزار دکەین و سەرخوەشییێن خوە پێشکێشی مالباتێن شەھیدان دکەینن کو ژ بۆ پاراستنا ئەولەھی و ئارامیا ھەرێما کوردستانێ خوە کرنە قوربانی و باشبوونا بلەز ژ بۆ برینداران دخوازین.”