پشتی راپەرینا گەلێ کوردستانێ، تیمێن مینهەلگر ل ناڤچەیێن سنۆری کارێ راکرنا مینا دکەن و زەڤی و رەز و جھێن مینکری پاقژ دکەن. نھا پەکەکە بوویە ئاستەنگ ل پێش وان تیمان کو ل ناڤچەیێن سنۆری کارێن خوە بکەن و بەردەڤکێ رێڤەبەریا کارووبارێن مین و تەقەمەنیا ژی راگەھاند: ‘”پەکەکە رێگرە ل پێش کارێ مە.”
بەردەڤکێ رێڤەبەریا کارووبارێن مین و تەقەمەنیێ ل دوھۆکێ رێگر عەبدولشاسی ژ بۆی باسنیۆزێ راگەھاند: “رۆژانە تیمێن مە ل سەرانسەرێ پارێزگەھا دوھۆکێ زەڤی و ئەردێن ھەموەلاتیان پاقژ دکەن ژ مینان.”
ھەروەھا گۆت: “لێ نھا پرسگرێکا ھەری مەزن ل پێش کارێ مە ھەبوونا پەکەکێ و بنکەیێن وان یێن ل ھندەک ناڤچەیانە. ژ بۆ نموونە ل سنۆرێ قەزا ئامێدیێ کو ترک ب بەھانەیا پەکەکێ ل وێ دەڤەرێ بۆمبەبارانێ دکەت و ژ بەر وێ ژی کارێن مەیێن ل وان ناڤچەیان راوەستانە.”
رێگر عەبدولشاسی گۆت: “مە تیمەکا تایبەت ل ناحیەیا کانی ماسێ ھەبوو ل دەڤەرا ئامێدیێ، کو رێیەکا دوورە و رۆژانە ل دوھۆکێ دچوونە وێ دەڤەرێ، ئەو کامپ جھێ مین و حەویانا وان کارمەندان بوو، کو شەڤ و رۆژ ل وێ ناڤچەیێ کار دکرن. لێ نھا پەکەکە بوویە رێگر ل پێش کارێن مە و مە ئەو کەمپا خوە ژی داخست.”
ھەرواھا دیار کر: “حەتا پەکەکێ بنکە و بارەگەھێن خوە ل وان ناڤچەیان ھەبن، بالەفرێن ترکیێ ناڤچەیێ دێ بۆمبەباران کەن و ئەم ژی ژ ترسا ھندێ و ترسا جانێ کارمەند و مینهەلگرا نکارین کار بکەین.
ناڤبۆری تەکەز کر: “مە کامپا کانی ماسێ ڤالا کر و مە کارێن خوە ل وێ دەڤەرێ راوەستاندن. ئەڤ یەک ژی زیانێ دگەھینیتە گوندی و کاسبکاران. ژ بەرکو مین دێ ب وان ڤە پەقن و بوویەرێن نە خواستی دێ دروست بن.
