رۆژهلاتێ کوردستانێ د ریزا یەکەم یا بێکارترین ناڤچەیێن ئیرنێ دا یە

رژێما ئیرانێ بەردەوام هەول دایە کو پارێزگەهێن رۆژهلاتێ کوردستانێ د بێکاری و هەژاریێ دا بهێلەیت داکو نەکارن پێشکەتن و سەرهلدانێ ب خوە ڤە ببینن.

ل گۆر ئامارێن ناڤەندا ئامارا رژێما ئیرانێ، د چەند مەهێن رابووری دا، رێژەیا بێ کاریێ گەهشتیە سەدێ 9.7، ب واتەیەکا دی نێزیکی سەدێ 10 یا کەسێن دخوازن کار بکەن نەکارینە کار ب دەست خوە بێخن.

وەکو هەر جار پارێزگەها سنە ل رۆژهلاتێ کوردستانێ د وارێ بێکاریێ دا ب رێژەیا 18.8 ژ سەدێ د رێزا یەکەم دا جیهـ دگریت، د رێزا دویەمین و سێیەمین دا ژی دو پارێزگەهێن دی یێن رۆژهلاتێ کوردستانێ تێن. پارێزگەهێن ئیلام و لۆرستان د رێزا پێشیێ یا بێ کار ترین پارێزگەهێن ئیرانێ دا تێن.
جوداهیا بێکاریێ د ناڤبەرا پارێزگەها سنە و کرماشانێ دا ب هەڤبەرکرن د گەل پارێزگەهێن دی دا د ئاستا بلند دا دهێت حەساب کرن. ل گۆری ڤان ئامارا رێژەیا بێکاریێ د پارێزگەهێن سنۆری دا کو ژ نەتەوەیێن کورد و نەتەوەیێن نە فارس پێک تێن، پر زێدەترە.