حوسێن ناموەر، فەرماندارەکێ هێزێن پاسدارێن ئیرانێ، ل ناڤچەیا “دەرناخێ” یا ب سەر مەریوانێ ڤە د پەڤچوونەکێ دا بریندار دبیت و پشترا جانێ خوە ژ دەست ددەت.
شەڤا رابووری ب سەدەما پەڤچوونا هێزەکا لەشکری یا نەناسکری د گەل هێزێن ئەمنی یێن ئیرانێ ل ناڤچەیێن سنۆری یێن مەریوانێ ل رۆژهلاتێ کوردستانێ، فەرماندارەکێ هێزێن سوپای پاسداران دهێتە کوشتن.
ل گۆر نووچەیا ئاژانسا “میهر” یا ئیرانی ب ڤەگوهاستن ژ زاردەڤێ عەلیرەزا مەرزبانی، فەرماندارێ پاسەوانێن پارێزگەها سنە یا رۆژهلاتێ کوردستانێ، کەسەک ب ناڤێ “حوسێن ناموەر” فەرماندارێ پاسەوانێن سینۆری، شەڤا رابووری ل ناڤچەیا “دەرناخێ” یا سەر ب باژارێ مەریوان د پەڤچوونەکی دا ب گرانی بریندار دبیت و پاش برنا وی ژ بۆی نەخوەشخانەیا مەریوانێ جانێ خوە ژ دەست دایە.
ل گۆر هەمان چاڤکانیێ شەر و پەڤچوونا د ناڤبەرا هێزێن ئەولەهیا ئیرانێ و وێ هێزا لەشکری بۆ دەمەکی بەردەوام کر.
ئەڤ د دەمەکی دا یە کو هەیا نها هیچ هوورگلیەک ل سەر ڤێ پەڤچوونێ نەهاتیە پارڤەکرن و هیچ یەک ژ پارتی و لایەنێن رۆژهلاتێ کوردستانێ بەرپرساتیا ڤێ ئێریشێ نەخستیە سەر خوە.
