د چەند رۆژێن رابووری دا ب دەهان کەسێن سەلەفی و توندرەو ب پشتەڤانیا ئیسیخباراتا ئیرانێ هەول دانە بنەمایێن کورداتیێ و شارستانیەتا باژێرێ مەریوانێ تێک بدەن و خەلکێ باژێرێ مەریوانێ ژی ژ بۆی پاراستنا کلتوورێ خوە یێ نەتەوی دەرکەتن کۆلانان.
چاڤکانیێن نووچەیان ل رۆژهلاتێ کوردستانێ ئاشکەرا کرن کو د درێژاهیا پیلانێن رژێما ئیسلامی یا ئیرانێ دا ژ بۆی دژاتیکرنا نەتەوا کورد و دروستکرنا جوداهیان و فەوازایێ د ناڤبەرا گەلێ کورد ل رۆژهلاتێ کوردستانێ دا و تێکدانا بنەمایێن شارستانیەتا کوردستانێ ب گشتی و ب تایبەتی باژێرێ مەریوانێ، هندەک کەسێن کرێگرتی و توندرەوێن ئیسلامی، ب چەکێن سار و گەرم بەربوونە جانێ خەلکی و ئێریشی سەر خەلکێ مەریوانێ دکەن و دەما خەلکێ باژێری ل دژی وان راوەستای هێزێن سەر ب ئیتیلاعاتا ئیرانێ ڤە راستە راست و نە راستە راست هاریکاریا وان تەرۆریستان کر.
هێژایی گۆتنێ یە کو ئەڤ پەڤچوونە ل تاخێ دارسەیرانا کەڤن پێکهاتیە و دەما هندەک کەسێن سەلەفی ئێریشی سەر گەنجەکێ وی تاخی کری و ئەو بریندار کری، خەلکێ دارسەیران تێنە جواب و وان کەسێن سەلەفی ل تاخێ خوە دەر دکەن، لێ ئەڤ کەسە کو کەسێن بەرنیاس و کرێگرتی یێن رژێما ئیرانێ نە و ژ ئالیێ خەلکێ مەریوانێ و ناڤچەیێن دەردۆر تێن ناسکرن، دیسان گەفان ل خەلکێ مەریوانێ دکەن و وان تەهدید دکەن کو جارەکا دی ئەو دێ ب هێزەکا زێدەتر ڤەگەرن.
هەر ژ بەر ڤێ سەدەمێ خەلکێ مەریوانێ شەڤا رابووری ب هاتنە ناڤا جادەیان دە پشتەڤانیا خوە ژ خەلکێ دارەسەیران و چاندا رەسەن ئا نەتەوەیا خوە رە دیار کرن و ئەڤ پەیامە گهاند سەلەفی و کەسێن کرێگرتی یێن رەژێمێ کو مەریوان جیهێ داعش و ئەمیرێن وێ نینە و وێ ب توندترین شێواز بەرسڤا وان دن.
