ل عەفرینێ چەکداران مالا کوردەکێ ئێزدی کرە مزگەفت

ھاتە راگھاندن، ل گوندێ بافەلوونێ یێ ل ھەرێما عەفرینێ یا رۆژئاڤایێ کوردستانێ کو ھاتیە داگیرکرن چەکداران مالا کوردەکێ ئێزدی کریە مزگەفت.

گوندێ بافەلوونێ ژ 80 مالان پێک دھات و ھەموو خەلکێ وێ کوردێن ئێزدی بوون، نھا ب تەمامی ڤالا بوویە و چەکدارێن ب سەر ترکیا ڤە ل وێ دەرێ 25 ھەزار دارێن زەیتوونان، 5 ھەزار مێوێن تری، 20 تراکتۆر، 5 ئۆتۆمۆبیل و گوڤاشتەکەکa زەیتوونان تالان کرنە.

ھەروھا 150 مالباتێن عەرەب د ناڤ مالێن گوندیان دا و 50 مالباتێن دی یێن ژ دەرڤە ئانینە ژی د کامپەکێ دا ھاتنە بجھکرن.

گوندێ بافەلوونێ کو سەر ب ناڤچەیا شەرایا عەفرینێ ڤەیە، پشتی داگیرکرنا عەفرینێ حەتا گۆرستانێن وێ ژی ھاتنە تێکدان و ل ناڤ گوندی مالا کوردەکێ ئێزدی کرنە مزگەفت.

چالاکڤان زەینەب جمۆ کو ژ گوندێ بافەلوونێ یە بنپێکرنێن ل دژی خەلکێ ھەرێما عەفرینێ پێک تێن دیکیۆمێنت دکەت.

جمۆ دبێژیت، گوندێ بافەلوونێ گوندەکی سادە یێ ئێزدیان بوو. ئیسلامیستێن دەولەتا ترک، ل بەر چاڤێن ناتۆیێ گوندێ بافەلوون داگیر کرن، خەلکێ گوند ھەموو رەڤیان و چەکداران ھەموو تشت تالان کرن و رێ نەدان کەسەک ڤەگەریت.