ئەنجوومەنا نیشتیمانی یا کورد ل سووریێ (ئەنەکەسێ) داخواز ژ جڤاکا ناڤدەولەتی کر کو دانپێدانێ ب ھلبژارتنێن سەرۆکاتیا رەژیما سووریێ یێن بریارە 26ێ گولانێ بهێنە کرن، نەکەن.
ئەنەکەسێ ب داخویانیەکێ راگھاند، د ڤێ دەما کو گەلێ سووریێ ب ھەموو پێکھاتەیێن خوەیێن نەتەوی و ئۆلی ژ بەر کوشتن، وێرانکرن، کۆچکرن و ھەژاریێ دنالیت، دو ل سەر سێ ژ گەلێ سووریێ کۆچبەر و پەنابەر بوونە و زەمینەیا ئەولەهـ و ل بار نینە، رێژیما سووریێ ل دژی ئیرادەیا گەلێ سووریێ و ئیرادەیا ناڤدەولەتی و ھەموو بریارێن وێ، دەست ب ئامادەکاریێن ھلبژارتنێن سەرۆکاتیا سووریێ کرنە.
ئەنەکەسێ دیار کر: “ئەڤ رەژیم ژ بلی ئێشا گشتی یا خەلکێ سووریێ، سیاسەتەکە نژادپەرەستا کرێت ل ھەمبەر گەلێ مەیێ کورد پێک تینیت، ژ گوھارتنا جوگرافیێ، پرۆسەیێن عەرەبکرنێ و بێبارکرنا گەلێ مە ژ مافێن خوەیێن نەتەوەیی یێن ھەری بنگەھین دمەشینیت. رێژیم ھەموو سیاسەتێن ئاوەرتە ب سەرێ گەلێ مە تینیت، ژ بەر کو ئەو ل ھەرێمێن خوە تەڤلی شۆرەشا سووریێ یا ئاشتیانە بوونە”.
ئەنەکەسێ داویێ گۆت: “ئەم وەک ئەنجوومەنا نیشتیمانی یا کورد ل سووریێ و پێکھاتەیەکا ئۆپۆزیسیۆن و شۆرەشا سووریێ، داخوازێ ژ جڤاکا ناڤدەولەتی دکەین، فشارێ ل رێژیما سووریێ بکەن، ژ بۆ ئیرادەیا ناڤدەولەتی یا پێکئانینا چارەسەریەکا سیاسی یا دادوەرانە ب جھ بکەت، ب ئاوایەکی کو ئێش و ئازارێن گەلێن سووریێ ب داوی بهێن و گەلێ سووریێن د ئازادی و روومەتێ دا بژیت.”
