فه‌رماندارێ هێزێن پاسه‌وانێن سنۆر یێ ئیراقا فه‌ده‌رال رادگه‌هینیت، رێخستنا په‌كه‌كێ رێ ژ بۆ ئارتێشا تركیێ خوه‌ش دكه‌ت كو هێرشان بكه‌ته سه‌ر ئیراقێ.
فه‌ریق روكن حامد حسێنی د داخویانییه‌كێ دا ل ده‌ربارا هێرشێن ده‌وله‌تا تركیێ ل سه‌ر باشوورێ كوردستانێ دبێژیت: هه‌بوونا چه‌كدارێن رێخستنا په‌كه‌كێ ل ناڤچه‌یێن باشوورێ كوردستانێ، هێجه‌تان ژ بۆی ده‌وله‌تا تركیێ چێدكه‌ت كو هێرشا ئیراقێ بكه‌ت.
ده‌ست نیشان كر كو كارێن وه‌زیرێ ناڤخوه یێ ئیراقێ ئۆسمان غانمی ب پراكیتك د ڤێ ده‌ربارێ دا ده‌ست پێ كرینه ژ بۆ دیتنا چاره‌سه‌رییان.
فه‌رماندارێ پاسه‌وانێن سنۆر ئاشكرا كر، ئارتێشا تركیێ ل ڤێ داویێ 20 كیلۆمه‌تران كووراهی كه‌تینه د خاكا ئیراقێ دا و گۆت: ئه‌م دێ ل رۆژێن پێش مه نوقته‌یێن خوه ل سه‌ر سنۆری زێده كه‌ین ژ بۆ كو رێ ل به‌ر ئارتێشا تركیێ بهێته گرتن كو زێده‌تر ل سنۆرێ زاخۆ نه‌هێنه پێش.
فه‌رماندارێ پاسه‌وانێن سنۆر یێ ئیراقێ هه‌روه‌ها گۆت كو خه‌باتێن ئارتێشا ئیراقێ ب هه‌ماهه‌نگی ل گه‌ل حكوومه‌تا باشوورێ كوردستانێ دهێنه ئه‌نجام دان.
