“ب بایکۆتکرنا هلبژارتنێن ڤێ جارێ یێن سەرۆک کۆماریا رەژێما ئیسلامی، ب تەڤاهی پووچبوونا رەژێمێ ژ هەموو جیهانێ را ئاشکەرا بکەن.”
ناڤەندا هەڤکاریا حیزبێن رۆژهلاتێ کوردستانێ د راگهاندنا خوە یا ژمارە «1» دا، هلبژارتنێن سەرۆک کۆماریا ئیرانێ بایکۆت دکەن و داخوازێ ل گەلێ رۆژهلاتێ کوردستانێ دکەن بلا ناڤەندێن دەنگدانێ ل کوردستانێ ل هەموو ناڤەندێن دی یێن ئیرانێ چۆلتر بن.
د بەشەکێ راگهاندنێ دا هاتیە: کۆمارا ئیسلامی یا ئیرانێ د مەها خزیرانا ئیسال دا دێ جارەکا دی شانۆیا ب ناڤ هلبژارتنێن خوە ب رێڤە بەت. ئەڤە د دەمەکێ دا یە کو رەوشا ئابووری، سیاسی و جڤاکی یا ئیرانێ د خرابترین رەوش دایە د دیرۆکا قرێژا کۆمارا ئیسلامی دا. رێڤەبرنا خراب و نەبەرپرسانە یا ئابووریا وەلاتی، گەندەلیا بێ رادە یا بەرپرسێن ڤێ رەژێمێ و دوورپێچێن ئابووری، ئیرانا د بن دەستهلاتا کۆمارا ئیسلامی دا ئانیە سەر لێڤا ژناڤچوونێ.
د ڤێ راگهاندنێ دا روو ب گەلێ رۆژهلاتێ کوردستانێ هاتیە: “ئاستێ نەرازیبوونا گەل هەر کو دچیت بەر ب زیدەبوونێ دچیت و گەل ب تەڤاهی ژ ڤێ رەژێمێ بێ هێڤی بوونە و ئەڤ نەرازیبوونا گەل ئێدی نە ب تەنێ تایبەتمەندیا نەتەوەیێن بن دەستێ ئیرانێ نە، بەلکو هەموو تەخێن جڤاکێن ئیرانێ ب خوە ڤە گرتنە.”
دیارە رەوشا کوردستانێ حەتا رادەیەکێ بەر ب چاڤ خرابترە ژ هەموو بەشێن دی یێن ئیرانێ. گەلێ کورد ژ بلی گڤاشا ئابووری یا کو ب سەر وان دا هاتیە فەرزکرن، د هەموو وارێن دی دا ژی هەر د بن گڤاشێ دا نە.
د بەشەکێ دی یێ راگهاندنا ناڤەندا هەڤکاریا پارتیێن کوردستانا ئیرانێ دا هاتیە تەکەز کرن کو پاش هەلسەنگاندنا رەوشا نها یا ئیرانێ و ناڤچەیێ ب ڤێ ئەنجامێ گهیشتن کو بەشداربوونا گەل د ڤێ هەلبژارتنێ دا هەر وەکو جارێن بەرێ چ دەستکەفتەک ژ بۆی گەل نابیت و ب تەنێ دبیت ئاموورەک پرۆپاگاندایێ ژ بۆی کۆمارا ئیسلامی بۆ نیشاندانا ڤێ یەکێ کو د ناڤا گەلێن ئیرانێ دا رەواتی هەیە. ژ ئالیەکێ دی بەشداربوونا گەل د ڤێ هلبژارتنێ دا دێ بیتە ئهاریکار و بەهانەیا بن دەستیا زیدەتر، ئیشکەنجەیا زێدەتر و سێدارەدانێن زێدەتر ژ بەرێ و دێ بیتە موهرا ئەرێ کرنا کارێن کۆمارا ئیسلامی.
د داویێ دا ناڤەندا هەڤکاریا پارتیێن رۆژهلاتێ کوردستانێ بانگ ل گەلێن ئازادیخواز یێن ئیرانێ ب گشتی و ب تایبەتی رۆژهلاتێ کوردستانێ دکەت کو هلبژارتنێن سەرۆکۆماری جڤاتێن باژار و گوندان بایکۆت بکەن و ب بەشداری نەکرنا خوە و چۆل راگرتنا ناڤەندێن دەنگدانێ، ڤێ هلبژارتنێ بکەنە رەفەراندۆما “نا” ژ بۆی کۆمارا ئیسلامی و هەموو جینایەت و گەندەلیێن وێ.
