ئه‌مه‌ریكا: رۆلا «دژه‌تیرۆرا ئێكه‌تیێ» د كوشتنا قاسم سوله‌یمانی دا سه‌ره‌كی بوو
كوشتنا هه‌ر یێك ژ قاسم سوله‌یمانی، فه‌رماندارێ فه‌یله‌قا قودسا ئیرانێ و ئه‌بو مه‌هدی موهه‌ندس، جێگرێ ده‌سته‌یا حه‌شدا شه‌عبی جاره‌كا دی گه‌رم و گۆڕ بوو، لێ ڤێ جار ئه‌مه‌ریكایێ هنده‌ك نهێنی ئاشكرا كرینه و دبێژیت: رۆلێ دژەتیرۆرا ئێكه‌تییا نشتمانییا کوردستانێ، د کوشتنا قاسم سولەیمانی و ئەبۆ مەھدی موھەندس دا سه‌ره‌كی.
مالپه‌رێ Yahoo News یێ ئه‌مه‌ریكی، راپۆرته‌ك ل سه‌ر ئۆپه‌راسیۆنا كوشتنا سوله‌یمانی و موهندس به‌لاڤ كرییه و تێدا وورده‌كاریێن خه‌ته‌ر ئاشكرا كرینه و ئاماژە ب رۆلێ دژەتیرۆرا ئێكه‌تیێ د وێ ئۆپەراسیۆنێ دا دكه‌ت.
د راپۆرتێ دا ھاتییە، 3 تیمێن تایبەتێن ئه‌مەریکی کو ب ھێزێن «دەلتا» دهێنه ناس کرن د ئۆپەراسیۆنێ دا بەشدار بوون، ڤێ هێزێ چەند ئەندامێن خوە وەک کارمەندێن باله‌فرخانێ نیشان دابوون و هنده‌ك ژی ل جھێن نێزیکی کۆلانا کو قاسم سولەیمانی لێ ھاتییە کوشتن به‌لاڤه كربوون.
ل گۆر مالپەرێ Yahoo، شەڤا ئۆپەراسیۆنێ یا سار بوو و ئاسمان ژی ئەور بوو و ئالیێ باشوور- رۆژھه‌لاتێ باله‌فرخانه‌یێ ده‌مه‌كێ کورت ژ بۆ چالاکیێن لەشکەری ھاتبوو گرتن.
ھات راگه‌ھاندن، 3 تیمێن نیشانڤانان 600 هه‌یا 900 یاردان ژ «ده‌ڤه‌را کوشتنێ» ئانكو رێیا باله‌فرخانه‌یێ ھاتنە ب جھـ کرن و سێگۆشەیەک ژ بۆ ئارمانجا وی ھاته ئامادە کرن، دەما سوله‌یمانی ژ فرۆکەخانەیێ دەرکەتی، یەک ژ نیشانڤانان ب دووربوونا چاڤدێریێ كو كامیرایه، دیمەن بۆ بالیۆزخانەیا ئه‌مەریکا یا ل بەغدایێ ڤەدگوھاستن کو فەرماندارێ ھێزێن دەلتا دگه‌ل هێزا پشتەڤانیێ ل وێرێ بوو.
د راپۆرتێ دا ھاتە دەست نیشان کرن، ھێزێن ده‌لتا نە ب تنێ بوون، بەلکو ئەندامەکێ دژەتیرۆرا باکورێ ئیراقێ (ھەرێما کوردستانێ) یا ب ناڤێ (CTG) کو گرێدایی ئێكه‌تیێ یه، ھەڤکارییا وان كرییه.
ھەروھا ئاشكرا کر، دەما قاسم سولەیمانی ژ سووریێ گه‌هشتییه ئیراقێ و ل باله‌فرخانه‌یا بەغدایێ داکەتی، ئەندامێن دژەتیرۆرێ خوە وەك کارمەندێن ڤەگوھاستنا چەنتەیان نیشان دان و ژ نێزیک ڤە ھەبوونا سولەیمانی پشتراست کرینە.
وی مالپەرێ ل سەر زارێ بەرپرسەکی ئه‌مەریکی ئاشكرا کرییە، رۆلێ دژەتیرۆرێ سەرەکی بوو، بەری بوویەرێ ئامادەکاریێن ھوور کرینە، ژ بۆ ڤی کاری.
مالپەرا Yahoo دیار کر، دەما ھەردوو ئۆتۆمۆبیل دەرباسی جھێ کوشتنێ بوون، باله‌فرێن درۆن ل وان ئۆتۆمۆبیلان رەشاندن و دو رۆکێتێن ژ جورێ “هێلفایه‌ر” ل ئۆتۆمۆبیلا سولەیمانی دان و ئەو وێران کر .
قاسم سولەیمانی و هاریكارێ سەرۆکێ گشتی یێ حه‌شدا شه‌عبی ئەبو مەھدی مه‌هه‌ندس ل رۆژا 3/1/2020 ل نێزیكی باله‌فرخانه‌یا بەغدایێ ھاتن کوشتن.
ئه‌مەریکا و رێڤەبەرییا سەرۆکێ ئامەریکا یێ بەرێ دۆنالد ترامپ ژی ئەو یه‌ك وه‌ك سه‌ركه‌فتنه‌كا ئه‌وله‌هیێ هه‌ژمارت.
