چاڤدێریا مافێن مرۆڤان ل سوورییێ د راپۆرتا خوەیا داوی دا راگھاند کو ژ بۆ گوھارتنا دیمۆگرافی یا عەفرینێ زێدەتری 350 ھەزار نیشتەجیێن ھەرێما عەفرینێ ھاتنە کۆچبەرکرن.
چاڤدێریا مافێن مرۆڤان ل سوورییێ د راپۆرتێ دا ئاشکەرا کر، 300 ھەزار کەسێن ھاوردە ل عەفرینێ ھاتنە بجھکرن و ئەڤ کریارا ب دەستێ ترکیا و کۆمێن چەکدار پێک دهێت وەکی تاوانەکا دژی مرۆڤاتیێ و پاکتاوکرنا ئەتنیکی ھاتە بناڤکرن.
د راپۆرتا “سۆھرێ” دا دهێتە گۆتن، رۆژانە ئارتێشا ترکیا و کۆمێن چەکدارێن ب سەر وێ ڤە تاوانێن ل دژی عەفرینیان پێک تینن و ب تایبەت ژی تاوانا گوھارتنا دیمۆگرافیک ئەنجام ددەن.
چاڤدێریێ دیار کر، سالا 2017ێ ب قاسی 700 ھەزار نیشتەجیێن رەسەن ل ھەرێما عەفرینێ بوون، لێ ب داگیرکرنا عەفرینێ ب سەد ھەزاران عەفرینی ھاتنە کۆچبەرکرن.
هەر وەها دا زانین، ل گۆری پەیمانێن د ناڤبەرا رووسیا و ترکیا دا ھاتینە کرن، زێدەتری 270 ھەزار مالباتێن چەکداران ل عەفرینێ ھاتنە بجھکرن.
ل گۆری راپۆرتا “سۆھرێ” ل ناڤەندا باژێرێ عەفرینێ کو زەدەتری 100 ھەزار عەفرینی لێ دمان، نھا کێمتری 30 ھەزار کەس لێ مانە و 74 ھەزار کەس ژ مالباتێن چەکداران ھاتنە بجھکرن و ب تەڤاھی نھا دەردۆرا 150 ھەزار کەسان ژ نیشتەجیێن رەسەن ل ھەرێما عەفرینێ مانە.
سۆھرێ ئاشکەرا کر کو هەرچەند پرانیا سڤیلێن د ناڤا عەفرینێ دا تەمەن مەزنن، دیسا ژی تێنە رەڤاندن و کوشتن.
ھەروھا سۆھرێ د راپۆرتێ دا دایە خویاکرن کو ژ بلی بجھکرنا مالباتێن چەکداران ل ناڤ مالێن خەلکێ عەفرینێ، ل باژێر و گوندێن عەفرینێ کامپ و وارگەھ ژی تێنە ئاڤاکرن.
سۆھرێ دیار کریە کو ئەو وارگەھ ب ھەڤکاریا ترکیا و ھندەک وەلاتێن عەرەبێن کەنداڤێ تێنە ئاڤاکرن.
سۆھرێ دەستنیشان کر، تاوانێن دژە مرۆڤاتی تێنە کرن و ب تایبەت گوھارتنا دەمۆگرافیک، گھیشتیە ئاستا قرکرنا ئەتنیکی.
سۆھرێ ھەروھا د راپۆرتێ دا، ترکیا ب سەدەما بنپێکرنا یاسایێن نەتەوەیێن یەکبوویی و پەیمانێن ناڤدەولەتی ل عەفرینێ وەکی داگیرکەر پێناسە کر.
