بابەک خۆرەمدین، دەرھێنەرێ سینەمایا ئیرانێ، ھاتە کوشتن. میرزا خۆرەمدین دەما مرنا خوە 47 سالی بوو.
پێس نها ھاتبوو راگھاندن کو لاشێ قەت قەتکری یێ زلامەکێ د ناڤ گلێشێ باژێرۆکێ ئەکباتان دا ھاتیە دیتن. پاش ڤێ یەکێ ئێڤارا رۆژا یەکشەمبێ، ئاژانسا نووچەیان یا ئیرانی ب ناڤێ رۆکنا راگھاند کو ئەو لاشە یێ یەک ژ دەرهێنەرێن سینەمایا ئیرانێ ب ناڤێ بابەک خۆرەمدینە.
ئیرۆ ژی محەمەد شەهریاری، سەرۆکێ دادگەھا جەزایا تەهرانێ، نووچەیا کوشتنا خۆرەمدین پشتراست کر، و گۆت: “جەنازەیێ ڤی کەسی ل ئەکباتان ھاتیە دیتن، و د دەما لێپرسینێ دا، دایک و بابێن دەرھێنەری ھاتنە گرتن و دانپیدان ب کوشتنا کورێ خوە کرینە. “
بەرماییێن ڤی کەسی د ناڤا چەنتەیەکێ دا بوون. رۆکنا د راپۆرتا خوە دا نڤیساند کو دایبابێن دەرھێنەری ل کوشتنا کورێ خوە موکور ھاتنە.
د ڤێ راپۆرتێ دا ھەر وەھا دهێتە گۆتن کو بابێ بابەک خۆرەمدین د دانپیدانێن خوە دا گۆتیە پۆلیسان کو، ژ بلی لھەڤنەکرنا وی د گەل کورێ خوە دا، کورێ وی ب تەنێ بوو و حەتا نها نەزەوجی بوو. هێژان نە دیارە کو بۆچی د دانپیدانێن خوە دا بابێ وی باس ل نەزەوجینا کورێ خوە کریە و ڤێ یەکێ چ پەیوەندی ب کوشتنا وی ڤە هەیە.
