ریخستنا پەکەکێ گه‌نجه‌كێ کورد یێ باشوورێ کوردستانێ کو ل سالا 2020ێ گه‌هشتییه رێزێن رێخستنێ، ب سووچا سیخۆریێ ژ بۆ ئێكه‌تیێ کوشت و پاش ژ مالباتا وی را راگه‌هاند كو ئه‌و د هێرشا باله‌فرێن ترکیێ دا شەهید بوویه.
هەستیار کامەران، یەک ژ گه‌نجێن کورد یێن باشوورێ کوردستانێ یە کو ل سالا 2003ێ ژ دایک بوویە، ئەو ئاكنجیێ تاخێ کوردستان یێ باژارێ سلێمانیێ بوو و ل دەستپێکا سالا 2020ێ په‌یوه‌ندی ب رێخستنا پەکەکێ كربوو.
چاڤكانیێن پێگەها دارکا مازی ل باشوورێ کوردستانێ راگه‌هاند، هەستیار کامەران ل دەستپێکا سالا 2020ێ گه‌هشتییه رێزێن ریخستنێ و بەشداری خولێن چەکدارێن نوو یێن پەکەکێ بوویە، پاش مەهەکێ ژ وه‌رگرتنا په‌روه‌ردێ، ژ ئالیێ پەکەکێ ب خوە ڤە هاته کوشتن.
چاڤکانیێن پێگەها مە هەروه‌ها ئاشكه‌را کرن، پەکەکێ ئەڤ گه‌نجێ سلێمانیێ ب سووچا سیخۆرییا ژ بۆ ئێكه‌تییا نشتیمانییا كوردستانێ دەستەسەر کرییە، پاش ده‌مه‌كی ژی هاتییە گوللـەباران کرن و کوشتن.
پشتی ئەڤ گه‌نجێ سلێمانیێ ژ ئالیێ پەکەکێ ڤە دهێته کوشتن، په‌كه‌كه مالباتا وی ئاگه‌هدار دكه‌ت کو کوڕێ وان ب هێرشه‌كا بالەفرێن جەنگی یێن ترکیێ دا هاتییە کوشتن.
هەرچەنده پەکەکێ ئەڤ گه‌نج ب سووچا سیخۆریێ کوشت، لێ بەلێ ژ بۆی کو مالباتا ڤی گه‌نجێ سلێمانیێ ب خوە ڤە گرێ بدەت و بازاڕەکی ب خوینا وی بکەت، ئەو وەک شەهید ب ناڤ کرییە و ب مالباتا وی راگه‌هاندییە د هێرشا باله‌فرێن ترکیێ دا هاتییە کوشتن، ژ بلی ڤێ یەکێ ژی شاندەکی تەڤگەرا ئازادی کو سەر ب پەکەکێ ڤە یە ل رۆژا 11/4/2021ێ ب مەرەما سەرخوەشیێ سەرەدانا مالباتا ڤی گه‌نجی کر.
هه‌رچه‌ند کو د ناڤبەرا پەکەکێ و ئێكه‌تیێ دا وەک دیار رێككه‌فتن و نزیکاتییەک هەیە، لێ بەلێ ئەڤ دوو حزبێن کوردستانێ ژێر ب ژێر ل دژی هەڤدوو تەڤ د گەرن و هەر یەک ژ وان د هەولا ژناڤبرا یێ دی دا یە، تشتێ کو نها وان نێزیكی هەڤ دکەت ب تەنێ جهێ پێدانا تەعلیماتایە کو هەر دو هیز تەعلیماتێن خوە ژ ئیرانێ وەردگرن.
هێژایی گۆتنێ یە کو ئەڤه چەندین جارن ب سوچا سیخۆرییا ژ بۆی ئێكه‌تیێ، پەکەکە هنده‌ك کادر و چەکدارێن خوە دکوژیت و پشترە وان وەک شەهید ددەته راگه‌هاندن.
