پشتی دەستەسەربوونا فەرماندارێ ئۆپەراسیۆنێن حەشدا شەعبی قاسم مەحموود کەریم موسلح ل ئەنبارێ ژمارەیەکا زێدە یا چەکدارێن حەشدا شەعبی دەریێن جاددەیێن ھەرێما کەسک ل بەغدایێ گرتن و داخوازا ئازادکرنا ئەندامێن خوە کرن.
مەدیایا ئیراقێ بەلاڤ کریە دەریێن جاددەیێن ھەرێما کەسک ل بەغدایێ ژ لایێ حەشدا شەعبی ڤە ھاتیە گرتن و داخوازێ ژ حکوومەتێ دکەن فەرماندارێ ئۆپەراسیۆنێن حەشدا شەعبی قاسم مەحموود کەریم موسلح کو ل ئەنبارێ ھاتبوو دەستەسەرکرن بهێتە ئازادکرن.
ھەروھا د ڤیدیۆیان دا دهێتە دیتن کو چەکدارێن حەشدا شەعبی ب چەکێن گران و سڤک و تانکان دەرکەتنە جاددەیێن بەغدایێ و ل جاددەیێن بەغدایێ بەلاڤ بوونە.
شانەیا راگھاندنێ یا ئەولەھیا ئیراقێ ب داخویانیەکێ ئاشکەرا کربوو کو فەرماندارێ ئۆپەراسیۆنێن حەشدا شەعبی قاسم مەحموود کەریم موسلح ل ئەنبارێ ھاتیە دەستەسەرکرن، کو ل سەر فەرمانا دادگەھێ و ل گۆر یاسایا رووبرووبوونا تەرۆرێ ھاتیە دەستەسەرکرن.
ھەروھا ل گۆر ھەمان چاڤکانیێ ھەژمارەک زیرەڤانێن وی ژی ل گەل ھاتنە گرتن و سەدەما گرتنێ ژی ژ بەر کو گەلەک دۆسیا ل سەر وی ھەنە، ب تایبەت ژی دۆسیایێن گرێدایی ب سامانێن گشتی نە.
چاڤکانیەکی ژ حەشدا شەعبی ژی راگەھاندبوو کو قاسم موسلح ب فەرمانا سەرۆکێ لژنەیا نەهێلانا گەندەلیێ، فەریق ئەحمەد ئەبو رەخیف ھاتیە گرتن، سەدەم ژی ئەو بوو کو رژدبوویە ل سەر رێنەدانا ھاتنا ھێزێن ئامەریکایێ ژ سووریێ ڤە بۆ ناڤ ئاخا ئراقێ.
قاسم موسلح فەرماندارێ ئۆپەراسیۆنێن ئەنبارێ یێ حەشدا شەعبی یە، یەک ژ فەرماندارێن حەشدا شەعبی یێن ھەری نێزیکی قاسم سلێمانی و ئەبو مەھدی موھەندیس بوو.
