سه‌رۆكێ به‌رێ یێ كۆمارا ئیسلامییا ئیرانێ، پێشبینی دكه‌ت ئیران هلوه‌شیت و راگه‌هاند، ئه‌و ناخوازیت ببیت به‌شه‌ك ژ خه‌راب بوونا ده‌وله‌تێ.
مه‌حموود ئه‌حمه‌دی نه‌ژاد سه‌رۆكێ به‌رێ یێ ئیرانێ، پاش كو كاندیدبوونا وی ژ ئالیێ ئه‌نجوومه‌نا پاراستنا ده‌ستوور ڤه ژ بۆ سه‌رۆكاتییا ئیرانێ هاتییه ره‌د كرن، گۆت: ئه‌ز نزانم چما كاندیدبوونا من هاتییه ره‌د كرن، كه‌سێ ئه‌و ماف نینه من ره‌د بكه‌ت، بێده‌نگ نابم ل سه‌ر ڤێ زولمێ.
ئه‌حمه‌دی نه‌ژاد د به‌شه‌كا گۆتنێن خوه دا باس ل ره‌وشا ده‌وله‌تێ كر و گۆت: پێشبینی دكه‌م ئیران هلوه‌شیت، ره‌وشا ده‌وله‌تێ پر خه‌رابه و ئه‌ز ناخوازم ببم به‌شه‌ك ژ ڤێ خه‌رابوونێ.
ل ده‌ربارا هلبژارتنان ژی گۆت: رێژه‌یا به‌شداربوونا خه‌لكی د ده‌نگدانێ دا گه‌له‌ك كێم بوویه و هۆشداری ژ كارڤه‌ندانێن ناڤخوه و ناڤده‌وله‌تی دان.
هه‌ر یێك ژ مه‌حموود ئه‌حمه‌دی نه‌ژاد، عه‌لی لاریجانی و ئیسحاق جیهانگیری ژ ئالیێ ئه‌نجوومه‌نا پاراستنا ده‌ستووری ڤه هاتنه ره‌د كرن كو خوه ژ بۆ سه‌رۆكاتییا ئیرانێ كاندید كربوون.
هلبژارتنێن ئیرانێ دێ ل 18 مه‌ها خزیرانا ئیسال 2021ێ هێنه كرن، پۆستێ سه‌رۆك كۆمارێ ئیرانێ، دووه‌م پۆستێ سیاسی یه، پاش پۆستێ رێبه‌رێ ئیرانێ.
