بەردەڤکا پارتیا یەکیتیا دەمۆکراتیک (پەیەدە) و ئەنداما کۆمیتەیا دانووستاندنانا شاندێ پارتیێن یەکتیا نیشتمانییا کورد (پەیەنەکە) سەما بەکداش راگھاند کو ئەو ئامادە نە رووبروو ئاستەنگێن ل بەر دیالۆگا کوردی-کوردی ل گەل بەرپرسێن ئەنجومەنا نشتمانییا کورد ل سووریێ (ئەنەکەسێ) گۆتووبێژ بکەن.
بەردەڤکا پەیەدێ و ئەنداما شاندا دانووستانکارا پەیەنەکێ سەما بەکداش، د جڤینا لگەل رەوشەنبیران دا داخواز ژ ئەنەکەسێ کر، رووبروو تەڤلی دیبەیتەکێ ببن و ئاستەنگێن دیالۆگا خوە ب ئاشکەرا گۆتووبێژ بکەن.
سەما بەکداش ئاشکەرا کر، تەڤی زەحمەتیێن دانووستاندنان لێ گاڤێن باش ھاتنە ئاڤێتن و پێویستە ئەو بەردەوامن.
حکوومەتا ھەرێما کوردستانێ و ئامەریکا سەرپەرەشتیا دانووستاندنان دکەن و ھەولا نێزیکرنا ئالیان ددەن، لێ ئەڤە دەمەکە ئەڤ دانووستاندنە راوەستیانە و ئاستەنگێن ل پێش ئەنجامدانا جڤینا راستەراست د ناڤبەرا ئەنەکەسێ و پەیەنەکێ نەھاتنە چارەسەرکرن.
ئەنەکەسە داخوازا گەرەنتیێ دکەت و دبێژیت، پێویستە سەرکردەیێن رێڤەبەریا خوەسەر و پەیەدێ دەست ژ زمانێ توند بەردن. لێ پەیەنکە ژی دبێژیت کو ئەنەکەسێ بەهانەیان دروست دکەت و دبێژیت، ئەو بوویە سەدەما راوەستاندنا دانووستاندنان و نابیت ئەو مەرجێن خوە دانیت و دڤێت بێ شەرت و مەرج بهێتە سەر مێزا دانووستاندنێ.
بەردەڤکا پەیەدێ سەما بەکداش بال کشاندە سەر بەردەوامی و سەرخستنا دانووستاندنێن ئەنەکەسێ و پەیەنکێ و گۆت: “ئەم دخوازین کۆمجڤینێن ب ڤی رەنگی چێببن کو کەسایەتێن ژ جڤاکا مە و رەوشەنبیر و سەربخوە و ئەم و برادەرێن مەیێن ئەنەکەسێ ژی ئامادە بین. بلا ئەم رحەت بین و ھەرکەس ھەر تشتی ببێژیت و بلا رەخنەیێن خوە بکەین. ئەگەر ھەردو لایەن ئامادە بن و پرس بهێتە کرن ھەر تشت دێ زەلال بیت. ھەرکەس گرنگیا دیالۆگا کوردی-کوردی دزانیت. ھەروھا ھەرکەس ژی دزانیت ئەم وەک کورد دیرۆکا خوە دا حەتا نھا پارچە پارچە ماینە و مە مافێن خوە بدەست نەخستینە. راستە زەحمەتیێن دیالۆگا کوردی-کوردی ھەبوون و دێ ھەبن ژی، لێ ئەز دبێژم گاڤێن باش ھاتنە ئاڤێتن. تەڤی زەھمەتیان مە گاڤێن دەستپێکێ 90% ئاڤێتنە.”
بەکداش ببیر خست کو ل سەر لێڤەگەرا سیاسی یا کوردی ل رێکەفتن کربوو و گۆت: “مە مژارا کو ئەڤ لێڤەگەرا سیاسی یا کوردی دێ چاوا ل پاشەرۆژا سووریا دا مافێ گەلێ کورد بپارێزیت و دێ خەباتێن وێ چ بن یەکئالی کربوو. مە مژارا رێڤەبەریا خوەسەر ژی 90 ژ سەدێ ب داوی کربوو و یەک خال مابوو ئەو ژی شێوازێ بەشداربوونا برادەرێن مە یێن ئەنەکەسێ بوو.”
