ل ڤان رۆژێن داویێ چالاکیێن پەکەکێ ل دژی ویلایەتێن یەکبوویی یێن ئامەریکایێ زەیدەتر دبن. د ھەیڤا گولانێ دا پەکەکێ دەستپێکی ب ناڤێ جوانێن شۆرەشگێر کاروانێ هێزێن سەربازی یێن ئامەریکایێ ل رۆژئاڤایێ کوردستانێ دابوو بەر کەڤرا. ھەری داوی ژی د 29ی گولانێ دال بەلچیکا، برووکسەلێ ل بەر دەرێ بالیۆزخانەیا گشتی یا ئامەریکایێ چالاکییەک ئەنجام دا. درۆشما (سلۆگانا) د ڤێ چالاکیێ دا دیار ئەڤە بوو “بلا ئامەریکا و ناتۆ دەستێ خوە ژ کوردستانێ بکشینین”. کوردێن کو پیچەکێ ژ سییاسەت و دیرۆکێ فام دکەن ل دژی ڤێ چالاکیێ دەرکەتن. لێ بەلێ پێویستە ئینسان هێشتا ژی ڤێ چالاکیێ و ئارمانجا وێ ب گشتی و سیاسەتا پەکەکێ شرۆڤە بکەت. ژ بەر کو ئەڤە نە چالاکییەکا سادە بوو.
پەکەکە ل برووکسەلێ و حەشدا شەعبی ل بەغدایێ ل دژی ئامەریکایێ چالاکیا دکەن
کی ژ ھەبوونا ناتۆیێ و ئامەریکایێ ل کووردستانێ عاجزە
کەسێن کو ژ ئامەریکایێ و ناتۆیێ عاجزن کو ل کوردستانێ بارەگەهێن وان یێن سییاسی و لەشکەری ھەنە داگیرکەرێن کوردستانێ نە. ژ بەرکو ئەو پەیمانێن کو کورد تێدا تێنە بندەست هێلان ژ ئالیێ سییاسەتمەدارێن رۆژئاڤایێ جیھانێ واتە ئەورۆپا؛ ئامەریکایێ و ھندەک ولاتێن دی ڤە نها تێنە ھەلوەشاندن. واتە باشوورێ کوردستانێ ب ھاریکارییا ئامەریکایێ، ناتۆ و دەولەتێن رۆژئاڤایی بوو حکوومەتا هەرێما کوردستانێ. ئانکو ستاتویەکا سیاسی و ناڤدەولەتی چێبوو. ئەڤ چەندە ژی بوو پێڤاژۆیەکا ترساناک ژ بۆی ترکیا و ئیرانێ. ھەمان دەم پشتی سالا 2 هزارێ هەرێما کوردستانێ بوو ناڤەندا سییاسەت و ناکۆکیێن رۆژهلاتا ناڤین. ترکیا حەتا نها ژ بەر مەسەلا کوردا ل دژی ئامەریکا و ناتۆیێ یە. ھەر هاریکاریەکا کو ژ بۆی یەپەگێ و هەسەدێ دچیتە رۆژئاڤایێ کوردستانێ ترکیا قیامەتێ رادکەت. ھەمان دەم هەر گاڤەکا ژ بۆی خورتبوونا هەرێما کوردستانێ بهێتە ئاڤەتین، ئیران ئالۆزییان دروست دکەت. سەری دا ژی ھەر دو دەولەت دخوازن کو کورد ل رۆژھلاتا ناڤین ڤەگەرنە سالێن 1930-1940ێ، کو د ڤی دەمێ دا کورد بێی کەس و بەلاڤ بووبوون. ژ بەر ڤێ یەکێ ژی ھەر دو دەولەت دخوازن ئامەریکا و ناتۆ ل رۆژھلاتا ناڤین بێ ھێز بمینن.
ئیرانێ ب ناڤێ تەکۆشینا ل دژی داعشێ میلیشیایێن حەشدا شەعبی چێکرن. دەما کو حەشدا شەعبی پیچەکێ ب ھێز کەتین دەست ژ داعشێ بەردان و ژ بۆی دەرخستینا ئامەریکایێ ژ ئیراقێ کار کر. تایبەت ژی ڤان سێ سالێن داویێ ئیران ژ بۆی کو ئامەریکایێ ژ رۆژھلاتا ناڤین دەربێخیت گەلەک ب هێز کار دکەت. ئێریشێن سەر کۆنسۆلخانەیا ئامەریکایێ ل بەغدایێ، ناڤەندێن عەسکەری حەتتا ئێریشێن ل هەولێرێ هەموو ل سەر ڤێ ئارمانجێ ھاتنە چێکرن. ئیرانێ دەما ئەڤ کارە کری ژ لایەکێ دی ژی ب هزاران شیعەیێن مەدەنی واتە خەلکێ سڤیل یێن شیعە دەرخستنە مەیدانا کو ببێژن “گەل ئامەریکا و ناتۆیێ ناخوازیت”.
نها ژی پەکەکێ کۆمەک کوردێن دەردۆرا خوە ئانینە مەیدانێ کو ببێژیت “کورد ئامەریکا و ناتۆ ناخوازن”.
یانی پەکەکە ژ سیاسەتێ فام ناکەت کو ڤی کاری دکەت؟ نەخێر. پەکەکە باش دزانیت کو ھەگەر ناتۆ، ئامەریکا و ھندەک ولاتێن ئەورۆپی نەبن داگیرکەر دێ هەموو کوردان داعیرن. ئەم هەموو ژی دزانین کو نە ناتۆ نە ئامەریکا نە ژی چ وەلاتەک دی، نە کو گەلەک حەژ کوردا دکەن ڤی کاری ئەنجام ددەن، نەخێر. ھەلبەت ژ بەر کو بەرژەوەندیێن ڤان ولاتان ل کوردستانێ هەنە ل ڤێرە دمینن. دیسا ئەم دزانین کو سیاسەت نە ل سەر حەژێکرنێ و نە ل سەر هەڤالینیێ ناهێتە کرن. سییاسات ل سەر بەرژەوەندی، ھەڤبەشی و بازاری دهێتە کرن. نها ئەم دزانین کو بەرژەوەندیێن کوردا د گەل ناتۆ و ئامەریکایێ ھەنە، بەرژەوەندیێن وان ژی د گەل مە ھەنە. ژ بەر ڤێ یەکێ ژی دڤێت کورد رێکێ ڤەکەن کو ناتۆ و ئامەریکا ل رۆژھلاتا ناڤین بمینن.
مە کوردا باش دیت کو دەما ئامەریکا و ناتۆ نەبن چ ل عەفرینێ قەومی. ھەمان دەم مە باش دیت کو دەما ئامەریکا خوە ژ سەرێکانیێ و گرێ سپی پاشڤە کێشای چاوا ترکیا ئەڤ جھە د 24 دەمژمێران دا داگیر کرن. مە ئەڤ تەجروبە ھەیە، سەرەرای ڤان تەجروبەیان ھەگەر کو ھندەک کەس رابن و ببێژن کو “بلا ئامەریکا ژ کوردستانێ دەرکەڤیت” ئەڤە ژی ب ڤێ رامانێ دهێت کو ئەڤ کەسە دبێژن ” ئیران و تورکیە فەرموون ھوون وەرن”.
دەرڤەی ڤی تشتی هیچ رامانەک نینە کو پەکەکە ئالیگرێن خوە کۆم بکەت و ببێژیت “ئامەریکا و ناتۆ خوە ژ کوردستانێ ڤەکێشن”. ئەڤ سییاسەتەب تەنێ خزمەتا ترکیا و ئیرانێ دکەت.
