ترکیێ راگه‌ھاند، بەرپرسێ ولایەتا ترکیێ یێ داعشێ، “قاسم گۆلەر” د ئۆپەراسیۆنەکا سازیا ئستخباراتا نشتمانییا وی وەلاتی میتێ دا ل سووریێ ھاتییە گرتن.
ئاژانسا فەرمییا دەولەتا ترکیێ راگه‌ھاند، بەرپرسێ ولایەتا ترکیێ یێ داعشێ «قاسم گۆلەر» ب كۆد ناڤێ «ئەبو ئوسامە ئەل تورکی» د ناڤ ئاخا سووریێ دا ژ ئالیێ میتێ ڤە ھاتییە دەستەسەر کرن و پشترە ژ بۆ ترکیێ ھاتییە ڤەگوھاستن.
ل گۆر ھەمان ئاژانسێ، ناڤێ وی بەرپرسێ داعشێ د کاتەگۆرییا ره‌نگ سۆرا لیستەیا تەرۆرێ یا ترکیێ دا بوویە.
ئاژانسا فەرمییا ترکیێ راگه‌ھاندییە، ل گۆر ئاگاھیێن ژ چاڤکانیێن ئەولەھیێ، ئەبو ئوسامە ئەل تورکی پلان دکر کو ب شێوەیەکێ نەقانوونێ ژ سووریێ ب چەک و تەقەمەنییان ڤه دەرباسی ترکیێ ببیت و چالاکیێن مەترسیدار پێک بینیت.
قاسم گۆلەر ئانکو ئەبو ئوسامە ئەل تورکی د ناڤبەرا سالێن 2008 ھەتا 2010 دا چوویە ئەفغانستان و پاکستانێ و د 2014ێ تەڤلی رەفێن داعشێ بوویە.
قاسم گۆلەر ژ بلی کو بەرپرسێ ولایەتا ترکیێ یا داعشێ بوویە، د ھەمان دەمێ دا بەرپرسێ دارایی یێ وێ رێخستنێ ل رووسیا، ئەورۆپا و ترکیێ ژی بوویە.
