پشتی شەهادەتا 6 پێشمەرگەیان، رێڤەبەرێ پەکەکێ مراد قارایلان ئاخافتنا کو ھەر کەس ل بەندێ بوو کر. چما ھەر کەس ل بەندا وی بوو؟ ژ بەر کو قارایلان راستەراست بەرپرسێ وێ ھێزێ بوو کو ئەڤ پێشمەرگە شەهید کری. وەکی دی، ئەوێن کو پەکەکێ دشۆپینن دابەشکرنا کارێ پەکەکێ یێ گشتی دزانن. دەما کو گازی چەپێن ترک بکەن مستەفا قاراسوو دەردکەڤیتە سەر شاشێ . دەما گازی ئیرانێ و ھێزێن ھەرێمی یێن دژی ئێمپەریالیزمێ بکەن جەمیل بایک داخویانیان ددەت و دبێژیت ئەم ل دژی ئەمپەریالیزمێ نە و تەنێ ل گەل ھێزێن رۆژھلاتا ناڤین دا ھەڤکاریێ دکەین. ژ لایێ دی دووران کالکان، ئاخافتنێن تەڤلیھەڤ دکەت. ژ بەر کو قارایلان ب کوردی دئاخڤیت و کەسەکێ بێ مەبدە و بێ مەزھەبە، ئەو رۆلا مرۆڤێ مەعقوول دگێریت.
کەنگی کو پێدڤی بیت کەربێن جڤاکا کوردی بهێنە نەرمکرن، ب تایبەتی ژی ل همبەر باشوورێ کوردستانێ نە ئەکتیڤ بکەت، قارایلان دهێتە ئەرکدارکرن. ژ بەر ڤێ یەکێ دبێژنە وی “مرۆڤێ مەعقوول”. ئەو ھەر کەسێ ھەڤسەنگ دکەت، بێ لایەن دسەکنیت، ووسا دیار دبیت کو ژ خوە پێ ڤە هزرا ھەر کەسەکێ دکەت، لێ مخابن، راستی بەرەڤاژییە. مرۆڤێن ووسا وەکو “ئاڤا بن کایێ” نە. جەمیل بایک ئاشکەرا خوە نیشان ددەت و دژمناتیێ دکەت، لێ مراد قارایلان دژمناتیێ دکەت و وەک دۆستەکێ خوە دیار دکەت.
ئەو مووشەکا پێشمەرگە شەهید کری مۆشەکا کۆرنەتە. پارچێن ڤێ مۆشەکێ ل جیھێ بوویەرێ ھاتنە کۆمکرن
قارایلان ئاخافتنا د ستێرک تیڤی دا ل سەر پێشمەرگەیێن کو پەکەکێ د 10ێ خزیرانێ دا شەھید کربوون، ئەڤ روویێ خوە دیسا ئاشکەرا کر. قارایلان مینا کو 6 پێشمەرگە چ جارا نە ھاتبنە شەھید کرن و چ پەیوەندیا وان ب کەسێن کو ئەو پێشمەرگە گولەباران کرنە نەبیت ئاخڤت. لێ بەلێ، د شەهیدکرنا ڤان 6 پێشمەرگەیان دا یەکەم بەرپرسیار قارایلانە. قارایلان نووچەیا پەکەکێ یا کو دگۆت “مۆشەک ل ترۆمبێلا خستنە” تەنێ ژ بۆ کو مەژییێ رایا گشتی تەڤلیھەڤ بکەت دوبارە کر. لێ وی ب دەڤێ خوە گۆت کو ھەڤالێن مە گولـلە بەردانە پێشمەرگە کو پێشدا نەھێن. ئەو ناڤچە ژ لایێ چەکدارێن پەکەکێ ڤە ھاتبو دۆرپێچ کرن. تەقە ل پێشمەرگا دھاتە کرن. ترۆمبێلا پێشمەرگا 400-500 میتران دوور رادوەستیت. ئەو مووشەکا پێشمەرگە شەهید کری مۆشەکا کۆرنەتە. پارچێن ڤێ مۆشەکێ ل جیھێ بوویەرێ ھاتنە کۆمکرن. پەکەکە وێنەیێن ڤان مۆشەکێن کۆرنەت ھەر رۆژ د گەریلا تیڤی دا بەلاڤ دکرن. ئەڤ مۆشەکە رووسیایێ چێکرنە و ئەڤە 4 سالن د دەستێ پەکەکێ دا ژی ھەنە. ئەڤ مووشەکە ل بازارێن چەکێن ئیراق و سووریێ گەلەک پەیدا دبیت. د ھەمان دەمێ دا ئەڤ مۆشەکە ل رۆژئاڤا ژی ھەنە. مووشەکا کو وان پێشمەرگە پێ شەھید کری، ژ لایێ ھێزێن قارایلان ڤە ھاتە ئاڤێتن. چ گومان ژێ د ڤێ یەکێ دا نینە.
قارایلان ئەو کەسە کو د 2002یێ دا فەرماندارێ گەریلا ب ناڤێ ناسر (فاروق بۆزکورت) بێی دودلی کوشتی، ژ بەر کو ڤی کەسی رەخنە ل ھەلوەستا ئۆجالان یا ل ئیمرالیێ گرتبوون
پەکەکە ژ بۆ کو تەڤلیھەڤیێ چێبکەت و ب ڤی رەنگی ژ بۆ ھندەک ژ لایەنگرێن خوە ماددەیێن پرۆپاگاندایێ ئاڤا بکەت، گۆت مە ئەڤ کارە نەکرییە. قارایلان د ئاخافتنا خوە یا ل ستێرک تیڤی دا ھەمان درەو بەردەوام کر. قارایلان ژ بۆ کوشتنا رێڤەبەرێ ئەولەھیا گشتی یا سەرزێری غازی سالح ئالیخان کوژەرەک ژ ھێزێن تایبەت وەزیفەدار کربوو. دگەل ڤێ یەکێ، ئەو دەرکەتن و گۆتن مە ئەو نەکوشتیە، مە چ پەیوەندی ب ڤی کاری ڤە نینە. وی دەمی، ھندەک مرۆڤێن عاقلمەند دگۆت کو ترکیا غازی شەھید کرییە. ھەمان تشت نھا ژی دقەومیت. لێ بەلێ، قارایلان ب خوینساریا خوە یا ھەرگاڤ فەرمانا کوشتنا پێشمەرگان ددەت. ھندەک ل سەر ئەکرانێن تەلەڤیزیۆنێ بەرێ خوە ددەنە ھەلوەستا پێکەنۆکا قارایلان و وی وەکو کەسەکێ راستگۆ و دلسۆز د نرخینن لێ ئەڤ هەلسەنگاندنە گەلەکا خەلەتە. قارایلان ئەو کەسە کو د 2002یێ دا فەرماندارێ گەریلا ب ناڤێ ناسر (فاروق بۆزکورت) بێی دودلی کوشتی، ژ بەر کو ڤی کەسی رەخنە ل ھەلوەستا ئۆجالان یا ل ئیمرالیێ گرتبوون. قارایلان دو زێرەڤانێن خوە ب شەڤ رێدکەت و ناسر ل وی جھێ لێ دما دکوژن. بەرییا سالەکێ ژ کوشتنا وی، قەرایلان و ناسر د یەک رێڤەبەرییێ دا پێکڤە کار دکر، لێ قارایلان بێی دودلی ئەو گولـلەباران کر. پشترا، قارایلان و رێڤەبەریا پەکەکێ داخویانیەک بۆ گەریلایان دا و گۆت، “یێکەتیێ ئێریشی وارگەھێ کر، ناسر د پەڤچوونێ دا ھاتە گولـلەباران کرن.” وی دەمی ژی ناڤبەرا پەکەکێ و یەنەکێ گەلەکا خوەش بوو. پشتی 15 سالا ، پەکەکێ نامەیەک نیڤ رووپەلی ژ بۆ مالباتا ناسر نڤیسا و گۆت کو ناسر شەھید بوویە، مە دەرەنگ هوون ئاگاھدار کرن، ژ بەر کو ئەم مژوول بووین. پەکەکە دکوژیت و دچیت سەر قەبرێ وی تازییێ ژی ددانیت. پەکەکێ ب ھەزاران رێھەڤالێن خوەیێن وەکو ناسر فەرماندێن گەریلا یێن 24 سالا ل چییا شەر کری گەلەک ب ھێسانی دکوژیت، ئەڤجا نەشێت پێشمەرگا بکوژیت؟ یانژی ھوون ھێڤییێ نە کو پەکەکە ببێژیت ب خودێ مە غازی ئالیخان و پێشمەرگێن دی شەھید کرنە؟ ب راستییا پەکەکێ ل، پەکەکێ بنێرن.
بێ گومان ئەو دێ بێژیت مە نە کوشتییە
بێ گومان ئەو دێ بێژیت مە نە کوشتییە. مراد قارایلان دێ بەرێ خوە دەتە چاڤێن خەلکی و بێژیت مە ئەو نەکوشتیە و ئەو دێ ل بەندێ مینیت کو خەلک باوەر بکەن. ئەو ب تایبەتی ژ بۆ کو خوە بدەتە باوەر کرن بەحسا خەلکێ دوھۆکێ ژی دکەت و دبێژیت، “خەلکێ دوھۆکێ رەوشەنبیرن، ئەو دخوینن، ئەو باوەر ژ ھەر کەسەکێ ناکەن.” قارایلان د ڤێ دەربارێ دا راست دگۆت. خەلکێ دوھۆکێ رەوشەنبیرن، ئەو ژی گەلەک باش دنیاسن. ژ درەوێن هەوە ژی تێربوونە. ئەو دزانن ھوون چاوا گوندیان وەکی مەرتالێن زندی بکار تینن، ھوون چاوا مالێن گوندییێن کو جیھێ خەوێ نادەنە هەوە دسۆژن، ھوون چاوا گوندان دشەوتینن. وان ژ بیر نەکریە کو ھوون چەوا د سالێن 1990ێ دا د چوونە گوندان و زارۆک دکوشتن. خەلکێ دھۆکێ ب چاڤێن خوە تەرمێن وان گەنجێن کو دخواستن ژ هەوە ڤەقەتن و هەوە ل سەر رێکا کوشتین، دیتنە.
خەلکێ دوھۆکێ و گەلێ باشوورێ کوردستانێ دگۆتن کو “مراد قارایلان ب کوردی دئاخڤیت، ئەو کوردەوارە، کوردستانی یە”. لێ نھا بارۆکێ وی کەت و کەچەلێ وی دییار بوو. نھا ھەر کەس دزانیت کو قارایلان شانۆکارەکێ شانۆیا پۆپولیستە، و قارایلانێ ل سەر شاشا تیڤیێ و قارایلانێ د ژیانا راستی دا نە یەک کەسن. وان پشتی ڤێ بوویەرا داوییێ ئەڤ روویێ تاری زەلالتر دیت. ئاخافتنا قارایلان د ناڤا گەلێ باشوور دا کارڤەدانێن مەزن دروستکرن. ب تایبەتی پەیڤێن قارایلان ژ بۆ پێشمەرگە بکارئینای بوونەە سەدەما کارڤەدانێن گەل.
د ئاخافتنا خوە دا، قارایلان ھەول ددەت کو ژ بۆ وان 5 پێشمەرگەیان نەبێژیت شەھید و بێ گونەھن
د ئاخافتنا خوە دا، قارایلان ھەول ددەت کو ژ بۆ وان 5 پێشمەرگەیان نەبێژیت شەھید و بێ گونەھن. ئەو ب قەشمەری دبێژیت: “ئەوان پێشمەرگا نەدزانی ب کو دا بچن.” ووسا نیشان ددەت کو ئەو ھاتنە خاپاندن و برن. ئەو پێشمەرگەیێن کو شەھید بووی، نە وەکو گەریلایێن قارایلان کەسێن تەمەنێ وان د ناڤبەرا 14 و 18 سالیێ دا بوون. یێ ژ هەموویان بچووکتر 32 سالی بوو، وان ب سالان د ھەمان قادێ دا وەکو پێشمەرگە تێکۆشەری کرنە. وەکی دی ژی، ئەو ئەندامێن ھێزێن تایبەتی بوون.
ھەمان دەم قارایلان لسەر گرتیا پێشنیار کر کو ل گەل مەسعوود بارزانی دا ھەڤدیتنێ بکەت. وی گۆت، “دەما کو من ئەو دیت ئەز دێ ھندەک تشتان بێژمێ”، و ب راستی ژی تشتەک ھەیە کو ئەز ژ بۆ تە بێژم. ھەر وەھا، دخوازیت ببێژیتە ترکان ژی بەرێ خوە بدەنێ ئەم وان دبینین.”گەلۆ قارایلان دخواست چ بێژیتە مەسعوود بارزانی؟ قارایلان گەلەک دەیندارێ مەسعوود بارزانی یە. ھەر گاڤا کو ئەو ئاسێ دبوو ژ مەسعوود بارزانی پشتگری دخواست، و ئەو چ جارا ژی دەست ڤالا نەڤەگەرییایە. د شەرێ پەکەکێ-یەنەکێ دا، پەدەکێ ئەو ژ وێ دۆرپێچێ خلاس کرن. ئەو ئۆپەراسیۆنا زاپێ یا ب ناڤێ رۆژ، ئەگەر ب هاریکاریا پەدەکێ نەبا ئەو ئێنجامێن پەکەکێ ل سەر پەسنا خوە ددا نەدبوون. لێ قەرایلان سەرەرای ڤان ھەموو قەنجییا، ھەرۆژ ل سەر چاپەمەنییا خوە پەدەکێ و سەرۆک بارزانی رەش دکەت و بێرێزییێ بەرامبەر وانا دکەت. ئەڤجا قەرەیلان دێ ب چ روو دەرکەڤیتە بەرامبەری مەسعوود بارزانی و دێ چ ژێ داخواز کەت.
ووسا دیارە کو قارایلان د وارێ ئسلوب-خیتابەتێ دا چاڤ ل رەجەب تەییب ئەردۆخان دکەت
ووسا دیارە کو قارایلان د وارێ ئسلوب-خیتابەتێ دا چاڤ ل رەجەب تەییب ئەردۆخان دکەت. دەمەک بەرێ، ئەردۆگان ل گۆری سەقایێ ھەر کەسەکێ شەربەت ددا، و رۆلا مرۆڤەکێ مەعقوول، مرۆڤەکێ تێگھشتی دگێرا. ئەردۆگان دگۆت کەفەنێ مە د دەستێ مە دایە. نھا مراد قارایلان عەینی تشتان دبێژیت. چاوا شێوازێ ئەردۆگان گەندەلی و رزین زێدەتر ل ترکیا دروست کریە. ژ بەرکو وی ھەرکەس ئیدارە کر و ئەو ئەجیندایا خوە یا قرێژ ژی خستە د پراکتیکێ دا.
قارایلان د ھەمان دەمێ دا ب گۆتنا ئەم بێملک و مالین دخواست خیتابی ھەستێن گەل بکەت. ھەر وەھا، د ھەڤپەیڤینێ دا، قارایلان ھەولەک تایبەتی دا کو پەسنێ خوە بدەت، دا کو نیشان بدەت کو ئەو کەسەکێ گرنگە، و د یەک خالێ دا وی گۆت “ئەز گەلەک دلپاکم”. لێ ئەو قەرایلانێ ئەم دناسین ریڤی یە. ریڤی یە لێ ڤێجارێ فێلبازیا وی د دەستێ وی دا ما، ماسکا وی کەت و گوھێت وی دییار بوون، ھەر کەسێ ب زەلالی دیت کو قارایلان نە کوردەوارە و نە ژی کوردستانی یە.
