ئەو فەرماندارێ پەکەکێ یێ کو ل سلێمانیێ هاتیە ئارمانجکرن کی بوو؟

ئەو فەرماندارێ پەکەکێ یێ کو ل سلێمانیێ هاتیە ئارمانجکرن کی بوو؟

ئوولاش دۆغان ئەو فه‌رماندارێ هه‌په‌گێ کو د ئێریشه‌كا ده‌وله‌تا تركیێ داه‌ ل سنۆرێ ناڤچه‌یا پشده‌ر یا گرێدای قه‌لادزێ سەر ب پارێزگەها سلێمانیێ ڤە هاتیە ئارمانج كرن، خوەدی دیرۆکەکا مەزن بوو د ناڤا پەکەکێ دا، ئەو د ناڤا پەکەکێ دا راستی هندەک پرسگرێکان هاتبوو، هندەک کەس دبێژن نە دوورە ئارمانجکرنا ئوولاش ژی یەک بیت ژ وان کارێن تەسفیەکرنێن ناڤخوەیی د ناڤا پەکەکێ دا و پەکەکێ یان سازیا ئیستخباراتی یا یەنەکێ زانیاری ل سەر وی ب میتا ترکیێ دابن، ژبەرکو پەکەکە هەر کەسێ کو ل گۆر ئایدۆلۆژیا وێ تەڤنەگەریت د ناڤا خوە دا تەسفیە دکەت.

ئاژانسا ANF یا په‌كه‌كێ ئاشکەرا کر ئوولاش ل 13 ڤێ مه‌هێ ل «هه‌رێمێن پاراستنا مەدیا» هاتیە ئارمانجکرن، لێ ب چ رەنگا باس ل چەوانیا ئارمانکرنا وی نەکریە، ئەڤ جارا یەکەم نینە کو فەرماندارێن پایە بلند یێن پەکەکێ ل سلێمانیێ تێنە ئارمانجکرن، د دەما دو سالێن رابووری دا چەندین بەرپرسێن ئاستا بلند یێن پەکەکێ ل سلێمانیێ هاتینە ئارمانجکرن، ئەڤ یەک ژی بوویە سەدەم کو گومان ل سەر پەکەکێ و سازییا ئیستخبارتی یا یەنەکێ یا ب ناڤێ زانیاری دروست ببن، گەل پرسیارێ دکەت بۆچی هەموو فەرماندارێن پایە بلند یێن پەکەکێ ل سلێمانیێ ب ڤی ئاوا ب هێسانی تێنە ئارمانجکرن.

گەلۆ ئوولاش دێرسمی کی بوو؟

ئوولاش خەلکێ دێرسمێ یە، ل گەلەک هەرێمێن کوردستانا باکور خوەدان پراکتیک بوو، ل سەر بنیاتێ فکرا کوردپەروەریێ تەڤلی رەفێن شۆرەشێ بووبوو، پشتی ڤان پراکتیکا ئوولاش سالا 2017-2018 بوو بەرپرسێ جەبهێ خواکورکی، دەما ئۆپەراسیۆنا وێ دەمێ یا ترکیێ کو ل سەر ناڤچەیا خواکورک ل باشوورێ کوردستانێ دەست پێ کری، ئارتێشا ترک هەرێما خواکورک و چیایێ شەکیف و لۆلان و خنێرە حەتا تەپێ لێرکان یێ هنداڤی دەشتا هێرتێ داگیرکرن. د ڤێ ئۆپەراسیۆنا کو ترکیا ئەڤ هەرێمە ژ دەستێن پەکەکێ ئانی دەر ئوولاش بەرپرسیار هاتە نیشاندان، د ڤێ ناڤبەینێ دا ژی ناکۆکی د ناڤبەرا ئوولاش و هەڤالێ وی یێ قەرارگەهێ یێ ب ناڤێ «تەکۆشەر گەڤەر» دەرکەتن.

سووچ هەموو ل سەر ئوولاش هاتن حەساب کرن، «تەکۆشەر گەڤەر» ژ ئالیێ جەمال ڤە هات پشتگیریکرن، لێ ئوولاش هاتە تاوانبارکرن و ئارمانجکرن و رووبرووی جەمال بوو، بنکەفتنا پەکەکێ ل خواکورکێ کرن سووچێن ئوولاش، ئوولاش ژ ئەرک گرتن و برن قەرارگەها گارێ ژ بۆی تەحقیقێ و ئەو دەمەکێ ل بن لێپرسینێ دا نیڤ گرتی هشتن، پاشان کو ئوولاش د لێپرسینا خوە دا ئەڤ یەک قەبوول نەکری، ئەو بێ ئەرک کر و شاندە پەروەردا ئۆجاخا پەکەکێ یا زڤستانا سالا 2017-2018 ژبۆی کو ل ڤێ دەرێ کادرێن د پەروەردەیێ دا وان ئیدیعایێن پەکەکە ل سەر وی دکەت مەحکووم بکەت و ب وی بدەنە قەبوول کرن کو ئەو سووچبار بوویە ژ بنکەفتنا پەکەکێ ل جەبهێ خواکورکێ.

ل داویا دەورا پەروەردێ ژ بەر کو دۆران کالکان و قارایلان رەخنە کربوون و گۆتبوو ئەو بنکەفتنا خواکورکێ نە ب تەنێ کێماسیا وی بوو، پلاتفۆرمەکا تایبەت ژ ئالیێ رێخستنا ژۆر و ب تایبەتی کالکان ژ بۆی ئوولاش هاتە چێکرن، دۆران کالکان ل وی ب غەزەب چوو، و ژێرا گۆت حەتا کو تو خوە دروست نەکەی تو ژ ڤێ پەروەردێ دەرناکەڤی، ئوولاش چ قاس گۆت ئەز نەخوەشم و پێویستیا من ب دختۆر هەیە لێ بەلێ کالکان ئەڤ یەک قەبوول نەکر، و ئەو بەشداری دەورەیا دویەمین یا پەروەردێ کر، لێ ئوولاش ئینسانەک خواندەڤان وخوەدی فکر و رامان و پراتیک بوو، پاشخانەکا شۆرەشگەرانە هەبوو، ئۆلاش ئەڤ نێزیکبوونا کو پەکەکێ و کۆنسەیا پەکەکێ لێ کری د مەژیکێ خوە دا مەحکووم کر و قەبوول نەکر، ئوولاش سووند خوار کو د قادا شەرێ بێ واتە دا نەمینیت، ژ بۆ ڤێ یەکێ دەما دەورا دویەمین خەلاس کری نەچوو قادا شەر و ئەو ئەرکێ ب وی هاتیە دایین قەبوول نەکر، ب نەچاری چوو ساحا تەنزیما گەل.

ژ بەر کو گەلەک چالاکی ل سەر ئوولاش هاتبوون تەسبیت کرن و ئەو گەریلایێن خوە رادەستی ترکیا کری و ئیتیراف ل سەر ئوولاش کری، ئوولاش د کاتەگۆریا سۆر دا ژ ئالیێ ترکا ڤە هات تەسبیتکرن.

ئوولاش پشتی کو چوویە ناڤچەیا سلێمانیێ ژ ئالیێ یەنەکێ ڤە هاتە تەسبیتکرن، ئوولاش هەم د ئالیێ ترکان دا و هەم ژی ژ ئالیێ پەکەکێ دا کەتبوو تەنگاسیەکا بێ مەجال، ئەو ل ناڤچەیێن بن دەستهلاتا یەنەکێ هات تەسبیت کرن و ئیمهاکرن، دۆران کالکان و قاریلان ئوولاش خستە ڤێ رەوشێ.

پوستێن ھەمان بەش