ل تەڤایا ناڤچەیێن کوردی ل رۆژئاڤایێ کوردستانێ دیاردەیا بنچاڤکرن و لەشکەرکرنا زارۆکان ژ لایێ جوانێن شۆرەشگەر یێن سەر ب پەکەکێ ڤە بەردەوامە، ھەری داوی ژی رەڤاندنا زارۆکەکا 17 سالی ل باژارێ کۆبانێ بوو .
ژێدەرەک خوەجھی ل باژارێ کۆبانێ راگھاند کو پێش چەند رۆژان یەکینەیێن پاراستنا ژنێ یەپەژێ زارۆکا ب ناڤێ یسرا کەمال شەریف مسلم یا تەمەن 17 سالی ژ تاخا پێشەسازیێ ل ناڤەندا باژارێ کۆبانێ رەڤاند، و بەرەڤ جھەکێ نەدیار ڤە بر، و تا نھا چارەنڤیسا وێ نە دیارە .
یسرا کەمال شەریف مسلم ژ دایکبوویا گوندێ ناسیفیێ یێ سەر ب باژارێ کۆبانێ یە و ل سالا 2004ێ ژ داییک بوویە ، و بەری چەند رۆژان ھاتیە بنچاڤکرن و تا نھا هیچ زانیاریەک ل سەر چارەنڤیسا وێ نەهاتیە زانین.
دهێتە زانین کو پێش نها رێڤەبەریا خوەسەر و ھەسەدێ ل خزیرانا سالا 2019ێ ل گەل نەتەوەیێن یەکبوویی ل دژی چەکدارکرنا زارۆکان پەیمانەک ئیمزا کربوو و پشترا ژی ئۆفیسا پاراستنا زارۆکان ژ شەرێ چەکداری ل رۆژئاڤایێ کوردستانێ ڤەکربوو کو کارێ وێ شۆپاندنا مژارا چەکدارکرنا زارۆکان و ڤەگەراندنا وانە، لێ بەلێ حەتا نها چەکدارکرنا زارۆکا ژ لایێ هێزێن سەر ب پەکەکێ ڤە بەردەوامە.
