ل جھێ کو کۆلبەر تێنە کوشتن چالاکیا “نە بۆ کوشتنا کۆلبەران”  هاتە ئەنجامدان

ل جھێ کو کۆلبەر تێنە کوشتن چالاکیا"نە بۆ کوشتنا کۆلبەران"  هاتە ئەنجامدان

ل دەڤەرا سنۆری یا تەتەیا ل پارێزگەھا سنەیا رۆژھلاتێ کوردستانێ چالاکیا “نە بۆ کوشتنا کۆلبەران” برێڤە چوو.

کۆمەک چالاکڤانێن سڤیل و کۆلبەرێن رۆژھلاتی ل سەر گرێ سنۆری یێ تەتە ل دەڤەرا ھەورامان یا رۆژھلاتێ کوردستانێ، کو نێزیکی باژارۆکێ سەولاوا ل پارێزگەھا سنەیە، کۆم بوون و چالاکیەکا واتەدار ئەنجام دا.

کەسێن کو بەشداری وێ چالاکیێ ببوون، ب راکرنا پانکارتێن کو ل سەر وان ھاتبوو نڤیساندن “نە بۆ کوشتنا کۆلبەران” و “نە بۆ کۆلبەریێ” نەرازیبوونا خوە ل ھەمبەر کوشتنا کۆلبەران ژ ئالیێ پاسدارێن ئیرانێ ڤە نیشان دان.

چالاکڤانان بانگ ل تەڤاھیا خەلکێ رۆژھلاتێ کوردستانێ کرن کو ل ھەمبەر کوشتنا کۆلبەران بێدەنگ نەمینن.

ل گۆر راپۆرت و ئاگاھیێن دەزگەھێن مافێن مرۆڤان، مەھا بۆری ھەری کێم 8 کۆلبەرێن رۆژھلاتی ژ ئالیێ ھێزێن ئیرانێ ڤە ھاتنە کوشتن کو پرانیا وان ل گرێ تەتە ھاتنە کوشتن، گەلەک کۆلبەر ژی بریندار بوون.