ل عەفرینێ چەکدارێن سەر ب ترکیێ 9 خۆرتێن کورد رەڤاندن

ل عەفرینێ چەکدارێن سەر ب ترکیێ 9 خۆرتێن کورد رەڤاندن

گرووپێن چەکدار یێن سەر ب ئارتێشا ترکیێ ڤە ب ئارمانجا کۆچبەرکرنا کوردان ژ ھەرێما عەفرینێ، ب ھەر ئاوایی زۆرداریێ ل خەلکێ وێ یێ رەسەن دکەن و رۆژانە کوردان درەڤینن و ئەشکەنجە ددەن.

رێخستنا مافێن مرۆڤان ل عەفرینێ بەلاڤ کر، چەکدارێن گرووپا سلێمان شاھ (ئەمشات) رۆژا 27ێ خزیرانا بۆری کالەمێرێ ب ناڤێ عەبدۆ ھدۆ ب مەبەستا ستاندنا فدیەیێ ژ باژارۆکێ شیێ رەڤاند، ئەو دا بن ئەشکەنجەیا ھۆڤانە.

وێ رێخستنێ دیار کر، پشتی کو چەکدارێن ئەمشات 3 ھەزار دۆلارێن ئامەریکی ژ مالباتا عەبدۆ ھدۆ ستاندین، ئەو سەربەست بەردا.

رێخستنا مافێن مرۆڤان ل عەفرینێ راگھاند ژی، خۆرتێ ب ناڤێ مستەفا محیەدین رەشید کو ژ دەما داگیرکرنا عەفرینی ژ بەری 3 سالان ژ ئالیێ چەکداران ڤە ھاتبوو رەڤاندن و د زیندانا رای دا راستی ئەشکەنجەیا ھۆڤانە ھاتبوو و لنگەکی خوە د بن ئەشکەنجەیێ دا ژ دەست دابوو، رۆژا 4ی ڤێ مەھێ ھات بەردان.

ھەروھا وێ رێخستنا مافێن مرۆڤان بەلاڤ کر ژی، گرووپا جەبھە ئەل-شامیێ 9 خۆرتێن کورد رەڤاندن و برنە بارەگەھا خوەیا ل گوندێ کەفر جەنێ و ب ئارمانجا ستاندنا فدیێ ژ مالباتێن وان، وان خورتا ئەشکەنجە ددەت.

رێخستنا مافێن مرۆڤان ل عەفرینێ دبێژیت، میلیشیایێن چەکدارێن سەر ب ھەڤپەیمانیا نشتمانی یا ئۆپۆزیسیۆنا سووریێ (ئیتیلاف) و د بن فەرمان و ئەجندەیێن ترکیێ دا کار دکەن، ب ھەر ئاوایی زولم و زۆرداریێ ل کوردێن رەسەن یێن عەفرینێ دکەن، دا کو نەچار ببن دەست ژ خاکا خوە بەردەن و کۆچبەر ببن.