پارتییا ئازادییا کوردستانێ هێرشا شه‌ڤا ده‌رباسبوویی یا ل سه‌ر هه‌ولێرێ شه‌رمه‌زار كر و راگهاند كو ئه‌ڤ هێرشا ته‌رۆری نكاره رێ ل به‌ر پێشكه‌تنا باشوورێ كوردستانێ بگره.
پاكێ ئیرۆ رۆژا چارشه‌مبی 7/7/2021ان، په‌یامه‌ك ل ده‌ربارا هێرشا شەڤا بووری یا ل سەر فرۆکخانەیا ناڤدەولەتییا ھەولێرێ دە بەلاڤ کر، د پەیاما پاکێ دە وھا ھات گۆتن:
«ئەڤە چەند جارن ھێزێن تەرۆری یێن ل دژی ئازادی، دەستکەفت و پێشکەتنێن ل باشوورێ کوردستانێ، ب هێرشێن ھۆڤانە بێته‌حه‌مولا خوە ل ھمبەر گەلێ کوردستانێ ددن دیار كرن، ئەڤ هێرشێن تەرۆری نیشانا دلرەشییا ھێزێن دژمنێن گەلێ کوردستانێ یە».
پاكێ گۆتییه: «چ شکا مە نینه، چاوا کو كۆمكوژی و جینۆسایدێن وەک ئەنفال، ھەلەبجە و یێن دن نکاریبوون رێ ل بەر دەستکەفتێن ھەرێما کوردستانێ بگرن، ئەڤ هێرشێن تەرۆری ژی نكارن رێ ل بەر پێشکەفتن، دەستکەفت، ئازادی و سەرخوەبوونا کوردستانێ بگرن».
هه‌روه‌ها پاكێ ل داوییا په‌یامێ گۆتییه: «گەلێ باشوورێ کوردستانێ ب لێخوەدیدەرکەتنا ل دەستکەفتیێن خوە، ب ھەڤگرتن و یەکتییا نەتەوی، نشتمانی دێ ڤان هێرشێن دژمنانە ژی پووچ بكه‌ت، ئەم هێرشا ل سەر فرۆکەخانەیا ناڤدەولەتییا ھەولێرێ ھاتییە کرن و ھەموو ھێزێن ل پشت ڤێ هێرشێ روورەش دکه‌ین».
