ل رۆژئاڤایێ کوردستانێ نەبوونا ئاڤێ باندۆرەکا خراب ل ژیانا ھەموەلاتیان دکەت

ل رۆژئاڤایێ کوردستانێ نەبوونا ئاڤێ باندۆرەکا خراب ل ژیانا ھەموەلاتیان دکەت

ژ دەستپێکا کریزا سووریێ دا حەتا نھا وەلاتیێن رۆژئاڤایێ کوردستانێ د رەوشەکا ئاوارتە و زەحمەت دا دەرباس دبن ژ ئالیێ دابینکرنا خزمەتگوزاری و پێدڤیێن ژیانا مرۆڤان یا رۆژانە.

یەک ژ وان زەحمەتیێن کو وەلاتی دبینن قوتکرنا ئاڤا ڤەخوارنێ ل ھندەک باژار و باژارۆکێن کوردستانا سووریێ مینا باژارێن سەرەکی یێن وەکو حەسەکێ و قامشلۆیە کو ئەڤ نەبوونا ئاڤێ کریزەکا ب باندۆرە و دبیتە جھێ پرسگرێکێ ل جەم ھەموەلاتیان.

ھەروەھا د دەربارێ ڤێ مژارێ دا ھەموەلاتیەک ژ قامشلۆ ژ تاخا “جوودی” ژ بۆ مالپەرا ئەنەکەسێ بەحسا رەوشا ئاڤێ ل تاخی دکەت: ب راستی مرۆڤ بێ ئاڤ نکاریت ژیانا خوە بەردەوام بکەت و ب تایبەتی د ڤی وەرزێ ھاڤینێ دا کو پلەیا گەرمیێ دگەھیتە ئاستەکێ بلند و د ڤێ رەوشا ئاوارتە دا مرۆڤ پێدڤی دابینکرنا ئاڤێیە .

ل سەر مژارا برینا ئاڤێ وەلاتیەکێ دی ژ ھەمان تاخی راگهاند: ژ دەما سێ رۆژان دا ئەو بێ ئاڤا ڤەخوارنێ نە و نەچار دبن کو ب رێیا تانکان کو د ناڤا کۆلانان دا دگەرن ئاڤا ڤەخوارنێ بکرن و دبیت کو ئەڤ ئاڤە نە یا پاقژ بیت و نەخوەشیان ژ بۆ مرۆڤی چێبکەت.

ھەمان کریزا برینا ئاڤێ ل باژارێ حەسەکێ ل کوردستانا سووریێ پایدا بوویە، ئەڤ یەک ژی ب سەدەما قوتکرنا ئاڤێ ژ وێستگەھا ئەلۆکا ئاڤێ ژ لایێ چەکدارێن گرێدایی دەولەتا ترکیێ ڤە، ئەڤ یەک باندۆرەکا ھەری مەزن ل سەر ژیانا خەلکێ وی باژاری دکەت.