فەرماندارێ ھەوالگریێ یێ سوپایێ پاسدارێن ئیرانێ حوسێن تەییب، ب فەرمانا رێبەرێ ئیرانێ عەلی خامنەیی، داخواز ژ میلیشیایێن ئیراقێ کرنە کو ئێریشێن خوە ل سەر بەرژەوەندیێن ئامەریکی ل ئیراقێ زێدە بکن.
ل گۆر چاڤکانیێن ئاگاھدار کو ژ بۆ ئاژانسا “رویتەرس” دیار کرنە، ھەفتەیا بۆری حوسێن تەییب سەردانا ئیراقێ کریە و لگەل میلیشیایێن شیعەیێن ئیراقێ جڤیایە و وی پەیاما رێبەرێ ئیرانێ عەلی خامنەی گھاندیە سەرکردەیێن میلیشیایان و گۆتیە وان، فشارێ ل سەر ھێزێن ئامەریکا ل ئیراقێ و سووریێ زێدە بکن، داکو ئەو ھێزێن خوە ژ ناڤچەیێ ڤەکشینیت.
ل گۆر وان چاڤکانیێن کو نەخواستین ناڤێن وان بهێنە ئاشکەراکرن، تەڤی وی فەرماندارێ ھەولگریا ئیرانێ سەرکردەیێن میلیشیایان ھان دانە کو ئێریشێن تۆلھلدانێ بکن، لێ رەوشێ ئالۆزتر نەکن.
چاڤکانیەکێ ژ میلیشیایێن چەکدار کو ژ وێ جڤینێ ئاگاھدارە دایە زانین، ئیرانیان شیرەت ل وان کرنە کو جۆگرافیا ئێریشێن خوە ل ئیراق و سووریێ بەرفرەھ بکن و ئێریشێن تۆلھلدانێ پێک بینن.
