38 سالا بەری نھا رۆژا 31/7/1983یێ ب پلانەکا ب بەرنامە ڤە دەستھلاتا وی دەمی یا ئیراقێ ب فەرمانا سەدام حوسێن ڤە ھەلمەتا گرتنا بارزانیان ل وارگەھێن حەریر، قوشتەپە، بەحرکە و دیانا دەستپێ کر و ئەو برن بۆ چۆلێن باشوورێ ئیراقێ و ل وێ دەرێ ب زندی ھاتن بن ئاخ کرن و کۆمکوژیەک وەھا ھات ئەنجامدان.
دو مەھان پشتی وێ سەرۆکێ رەژیما بەعسا ئیراقێ سەدام حوسێن ئارمانجا وێ تاوانێ نەڤەشارت و ب ئاشکەرایی ژ بۆی چاپەمەنیێ راگەھاند: “وان ب توندی جەزایێ خوە وەرگرتن و مە ئەو ئاڤێتن جەهەنەمێ.”
ل گۆر پیڤان و یاسایێن نەتەوێن یەکبوویی کو ب یەکدەنگی رۆژا 12/1/1951ێ پەژراندیە، کۆمکوژیا بارزانیان تاوانەکا دژی مرۆڤاھیێ یە و دکەڤیتە ناڤ خانەیا جینۆسایدێ. ژ بەر ڤێ ژی ل گەل تاوانێن دی یێن ئەنفال و ڤەگوھەستنا ب زۆرێ یا کوردێن فەیلی، کیمیابارانا حەلەبچێ و ئەنفالێ، تاوانا کوشتن و بێ سەرشوون کرنا بارزانیان ژی ژ ئالیێ دادگەھا بلندا تاوانێن ئیراقێ ڤە وەک تاوانا جینۆساید ھات ناسکرن.
پشتی سالا 2005ێ، ب گشتی ژ 16 دۆسیایێن کورد، ل دادگەھا بلندا تاوانێن ئیراقێ دا، تەنێ 6 دۆسیە ھاتنە زەلال کرن و ئەو ژی: “کیمیابارانا حەلەبچە، ئەنفال، بێ سەرشوون کرنا بارزانیان و فەیلیان” وەک جینۆساید ھاتیە ناس کرن.
ھەرچەند دادگەھا بلندا تاوانێن ئیراقێ رۆژا 3/5/2011ێ بریار دا ئەو تاوان وەک جینۆساید بێنە ناسکرن ژی، لێ حکوومەتا ئراقێ داخوازا لێبۆرینێ ل کەسوکارێن قوربانێن ئەنفال و بارزانیان نەکریە.
ئەنفالا بارزانیان 38 سالان بەری نھا ل رۆژا 31/7/1983ێ پێکھات و 8 ھەزار بارزانی ھاتن ئەنفال کرن و حەتا ناھا تەنێ تەرمێ 596 کەسێن ئەنفالبوویی ھاتنە ڤەگەراندن بۆ گۆرستانا تایبەتا جینۆسایدا بارزانیان یا ل بارزانێ.
