ل کۆنیایێ ل دژی مالباتەکا کورد هێرشەکا نهژادپهرستی هاته کرن، هێرشکار هنده ب کەرب و کین بوون كو ههر ئێكێ هاتییه كوشتن فیشهكهك ل سهری دایه، و وان دڤییا جەنازەیان ژی بسوژن، ڤێ بوویەرێ د ناڤ کوردان دا رهنگڤهدان چێکر، د هەمان دەمی دا ترسەک ژی چێکر، لێ ئەم نهشێین نه ب ترسێ و نهژی ب هەستان رێكێ ل ڤان بوویهران بگرین، پێدڤییە ئەم کورد کومکێ خوە دانین بەر خوە و ل سەر هەر تشتهكی جارەکا دی باش هزر بكهین، ژ بەر کو ل باکورێ کوردستانێ د وارێ ئیدۆلۆژی، سیاسی و ئارمانجی دا راوەستییان پر چەوتە.
براتییا گەلان کورد بەر ب ووندا بوون و کۆمکوژیێ ڤە کاش کرن
دڤێت کوردێن باکورێ کوردستانێ ل دهستپێكێ بزانن کو خالا کو ئەو لێ راوهستیانه چەوتە، رۆژا عهڤدلا ئۆجەلان ئیناینه ترکیێ و هەتا نوكه ئەڤه 22 سالن، خەتا «ل سەر بنگەها دەمۆکراتیکبوونا ترکیێ، ناسنامەیا ژۆرین یا ترکبوونێ، ژیانا ب هەڤ را یا ل سەر بنگەها براتییا گەلان» چ دەستکەفت بۆ کوردان نهئینایه، بەروڤاژی، کوردێن باکور بەر ب ووندا بوون و کۆمکوژیێ ڤە کاش کرینە، هەتا کو ئەم ڤێ راستییا دژوار باش دەرنەئێخین، ئەم وەک کوردێن باکور نهشێین خوە ژ ڤێ خەفکێ رزگار بکهین.
دەولەتا ترک هەبوونا خوە ل سەر کاڤلکرنا وەلاتێ کوردستانێ و قڕکرنا کوردان ئاڤا کرییە
ژ بەر کو ئارمانج و خەتا سیاسی یا دەولەتا ترک دیارە، دەولەتا ترک هەبوونا خوە ل سەر کاڤلکرنا وەلاتێ کوردستانێ و قرکرنا کوردان ئاڤا کرییە، ئەڤ رەوشه نهتهنێ گرێدایی حكوومهتا ئاکهپێ و مهههپێ یه، وەک هندەک ئالیێن سیاسی قالا وێ دکهن، ئەڤه د تەڤاهییا سەدسالا 20ێ ئانكو ب تەڤاهییا دیرۆکا کۆمارا ترکیێ ڤە گرێدایە، کۆمکوژی و بوویەرێن ل سەر «ئاگری، زیلان، دێرسم، نەوالا قەسابا، ڤارتۆ، کۆمکوژییا مەرەشێ، ڤالاکرنا 5 هەزار گوندان، کوشتنا ب هەزاران کەسێن كو کوژەرێ وان نەدیار د سالێن 1990 دا» بەرییا دەستهلاتا ئاکهپێ بوو، دەولەتا ترک ئەڤ هەموو بوویەرە کرینه، نها ژی دەولەتا ترک ب خوە دکەت، دەولەت، لەشکەر، پۆلیس، سیاسەتمەدار، گەلێ ترک ب هەموو سازیێن خوە ڤه ب هەڤرا ڤی کاری دکهن.
ترک باش دزانن گاڤا کو کوردستان رزگار بوو هەبوونا ترکان ژی نامینیت
د گهل ڤێ راستییا دیرۆکی یا دەولەتا ترک، ههدهپه دەرکەت هۆلێ و د داخویانییا خوە دا دبێژیت: «بەرپسیارێ کۆمکوژییا ل کۆنیایێ حکوومەتا ئاکهپێ و مهههپێ یە»، لێ بەلێ دەولەتا ترک ژ هەموو کۆمکوژیێن 100 سالان یێن ل سەر کوردان هاتینه كرن بەرپرسیارە.
دەولەتا ترک ب ئارتێش، پۆلیس، گەل و بیرۆكراتێن خوە ڤە ئێكن، د ناڤ وان دا ناکۆکی ههبن ژی لێ وان هەبوونا خوە ل سەر قرکرنا کورد – کوردستانێ ئاڤا کرییە، ژ بەر ڤێ سەدەمێ، ئەو د بن هەر شەرت و مەرجی دا ژ بۆ کوشتنا کوردان ب هەڤ را كار دكهن، د سهر ڤێ راستییا دەولەتا ترک را، کورد ئەڤه 22 سالن ل ناڤا دەولەتا ترک بۆ خوه ل «ئێكێ باش» دگەرن، د بێژن: «تانسوو چیلەر خراب بوو، ترگووت ئۆزال باش بوو، ئارتێشا ترک باشە، پۆلیسێ ترک خرابە، فەتحوللا گولەن خرابە، ئاردۆگان باشە، ئەرگەنەکۆن خرابە، کەمالیست باشن، هاکان فیدان باشە، سلێمان سۆیلو خرابە».
لێ بەلێ، چ جوداهی د ناڤبەرا سازی و رێڤەبەرێن دەولەتا ترک دا نینه، دۆرا کیژان حکوومەت و رایەداری بهێت ئەو دێ کوردان خۆت، ترک باش دزانن گاڤا کو کوردستان رزگار بوو هەبوونا ترکان ژی نامینیت.
ئەم نهشێین بێژینه وێ دەولەتا کو هەر رۆژ دخوازیت مە نههێلیت، برا
ئانكو، رەوشا کو کورد تێدا نە، هێرشا دەولەت و جڤاکا فاشیست و یا دەولەتا ترکە، تهك رێیا مان و خوەپاراستنا ل هەمبەر ڤێ نهژادپەرستییا ترکان ئەوە کو ئەم ژ دەولەتا ترک را ببێژین هوون «کۆلۆنیالیست و داگیرکەرن» و خوە ل گۆری وێ ب رێخستن بکهین، ئەم نهشێین بێژینه وێ دەولەتا کو هەر رۆژ دخوازیت مە نههێلیت، برا.
د دنیایێ دا تەنێ یەک دەرمانێ داگیرکەریێ هەیە ئەو ژی ئەڤەیه: نهژادپەروەرێ کورد مەجبوورن نهژادپەروەر بن.
هوون ل کیژان نەتەوە و جڤاکا كو خوە ژ داگیرکەریێ رزگار کری بنێرن، هوون دێ بینن کو وان خەتا نهژادپەروەری پاراستی یە و ئیسرارا خوە خوهبرێڤهبرنێ کرییە، وەکی دی ژی هوون ل دیرۆکا وان مللەتێن كو خواستین سەربخوە بژین بنێرن هوون دێ زانن کو نهژادپەروەری چ قاس ئەرکەکێ دیارە، نهژادپەروەری شیفرەیا ئازادییا نەتەوی یە، د دیرۆکا شۆرەشان دا راستییەک ب ڤی ئاوایی زەلال هەیە.
پهسهندا دیرۆکی یا بێ قوسیر یا ئیسماعیل بەشێکچی ژی پشتگریێ ددەت فەرزبوونا نەتەوەپەروەرییا کوردان، مامۆستا بەشێکچی دبێژیت: «پرسگرێکا کوردی پرسگرێکا بێدەولەتبوونێ یە»، بەلێ، پرسگرێکا هەبوونا کوردان وەک کورد تەنێ ب ڤان هەر دوو حالەتان چارەسەر دبیت، نەتەوەپەرەستی و دەولەت مینا ئەنەرژی و مادەیێ نە، نەتەوەپەرەستی ئەنەرژی یە، ل گۆری قانوونا فیزیکێ، هەر ئەنەرژییهكێ پێویستی ب ماددەبوونێ هەیە، نەتەوەپەرەستی ب بوونا دەولەتێ ڤە دبیته ماددە، ئەنەرژی نەتەوهپەرستی یه و ماددە ژی دەولەتە، د زاگۆنا مسۆگەرکرنا هەبوونا خوە دا وەک نەتەوە، پێکائینانا فکرا نەتەوەیی د دەولەتێ دا هەیە، پاش دەولەت دشێت خوە د ناڤا خوە دا بگوهەریت، پێدڤییه باکور ڤێ راستیا جڤاکی و سیاسی باش ببینیت.
پیدڤییە کوردێ مە یێ باکور ببینن کو درووشما «براتییا گەلان»، یا کو ئۆجالان و پهكهكه ئەڤه 22 سالن د گوهێ مە دا دبێژن و هەول ددهن کو کوردان پێ بدهن باوەر کرن، د راستیێ دا خەونا شەڤێ و چیرۆکەکا دەرەوە.
کۆمکوژییا کۆنیایێ هەموو هەست و رامانێن مە هەژاندن، ب تایبەتی کوردێن ل دۆرا ههدهپێ خوە ب رێخستن کرن، و پێتر ئهو ههژیان، ژ بەر کو د سهر ڤان 22 سالان را، راستییا کو (کورد) نە پارچهیهكن ژ دەولەتا ترکیێ، مینا زلهههكێ بوو ل روویێ کوردێن باکوور کەت، پیدڤییە کوردێ مه یێ باکوور ببینن کو درووشما «براتییا گەلان»، یا کو ئۆجەلان و پهكهكه ئەڤ 22 سالن د گوهێ مە دا دبێژن و هەول ددهن کو کوردان پێ بدهن باوەر کرن، د راستیێ دا خەونا شەڤێ و چیرۆکەک دەرەوە، لێ گەشتییا دەرەوا «براتییا گەلان» ل کۆنیایێ ب ناڤ بوو.
کوردێن باکوور د خەفکەکێ دا ئاسێ ماینە
ژ بەر ڤێ سەدەمێ دڤێت کوردێن باکور کومێ خوە بدهن بەر خوە و ل سەر ڤێ مژارێ ب کووراهی بفکرن، ژ بەر کو کوردێن باکور د خەفکەکێ دا ئاسێ ماینە، ئەو تێدکۆشن، قوربانییان ددەن، لێ ئەو پێنگاڤەکا بچوچک ژی پێشڤە ناچن و هەر رۆژ ژی خرابتر و کاڤلتر دبن، دڤێت کوردێن باکور ژ ڤێ راستیێ هایدار ببن: یێن هەبوونا مللی و نەتەوەیی یا کوردان، مافێ وان یێ خوە ب رێڤەبرنێ و مافێ ڤەقەتیانێ نەپارێزن، نهشێن سانتیمەترکێ ژی ژ بۆ کوردان پێشڤەچوونێ ئاڤا بکەن و نهژی دشێن رێكێ ل کۆمکوژیێن کوردان بگرن، ژ بەر ڤێ یەکێ یە کو ههدهپه ئیرۆ د رەوشەکا وە دایە کو تشتەک ب دەستێ وان ڤە ناهێت و نهشێن تشتەکی ژی بکهن.
ژ بەرکو ههدهپه ژ کۆلۆنیالیستی را نابێژیت کۆلۆنیالست
ههدهپه ژ وەلاتێ کوردان را نابێژیت کوردستان
«تشتێ ژ بۆ کوردان پێدڤییه خوه برێڤهبرنه» ههدهپه ڤێ نابێژیت
پێدڤییه کوردێن باکور دیسا ڤەگەرن سەر وێ خەتا خوە یا بەرێ، یا کو نوکە ووندا کری، کوردێن باکوور دڤێت دهست ژ وان چیرۆک و چیڤانۆکێن وەک «ژیانا ب هەڤ را و براتیا گەلان» بەردهن، گەر ئەم ڤێ نەکهین ئەم نهشێین تۆلا خوە ڤهكهین، ئەم نهشێین رێكێ ل کوشتنا خوە و زارۆکێن خوە بگرین، چەکێ د دەستێ مە کوردان دا تنێ پێشخستنا نهژادپەروەری و خوەدان دەرکەتنا ل کوردستانا سەربخوەیە.