سەرۆک بارزانی: شنگال برینەکا کوورە ل سەر لاش و جەستەیێ گەلێ کوردستانێ

ئیرۆ رۆژا سێشەمێ 3/8/2021ێ سەرۆک بارزانی د 7 سالیا جینۆسایدا شنگالێ دا پەیامەک بەلاڤ کر

پەیاما سەرۆک بارزانی وەھایە:

ب ناڤێ خوەدایێ مەزن و دلۆڤان

شنگال برینەکا کوورە ل سەر لاش و جەستەیێ گەلێ کوردستانێ و ئەوا تەرۆریستێن داعشێ 7 سال بەری نھا ل دژی خووشک و برایێن مەیێن ئێزدیان ئەنجام دای ئێش و ئازارەکە کو هیچ دەمەکێ ژ بیرا کوردستانیان ناچیت. ئەم باش دزانین د دەما ئێریشا تەرۆریستان یا ل سەر کوردستانێ، ئێزدی ژ بەر سەدەما کوردبوون و بیر و باوەریا ئۆلی ڤە کەتن بەر ئێریشا رک و بێویژدانیا تاوانبارێن داعش و ھاتن جینۆسایدکرن. ئەو تاوانا داعشێ ژی ل دەڤەرا شنگالێ ئەنجام دا بەردەوامیا وان زنجیرە جینۆساید و کۆمکوژی و تاوانان بوو کو ب درێژاھیا دیرۆکێ ل سەر گەلێ کوردستانێ ھاتیە ئەنجامدان.

ل حەفتەمین سالڤەگەرا وێ کارەساتێ دا سلاڤ ژ بۆ گیانێ شەھیدان و قوربانیێن وێ تاوانێ دشینین و ب رێز و روومەتێ ڤە وان پێشمەرگەیێن قەھرەمان ب بیر تینین کو ژ بۆ ئازادکرنا چیایێ شنگالێ و باژارێ شنگالێ خوینا خوە گۆری کرن و سەرێ داعشێن درندە خستنە بن پیێن خووشک و برایێن مەیێن ئێزدی و تۆلا وێ نەھەقی و زولمێ ل تەرۆریستان ڤەکرن.

جھێ داخەکا زێدەیە پشتی دەرباسبوونا 7 سالان ل سەر وێ کارەساتێ دا ھێژتا ژی ئێش و ئازارێن ئێزدیان ھەر بەردەوامن و شنگال ل دەستێ کۆمەک ھێز و چەکدارانە کو ھیچ پەیوەندیا وان ب بەرژەوەندیا شنگالێ و ئێزدیان ڤە نینە. ھەر ئەو ژی رێگربوونە ل ڤەگەرانا خەلک و ئاڤادانکرنا شنگالێ. ل ڤێرە دا ژ بۆ خووشک و برایێن ئێزدی ڤێ یەکێ دووپات دکم کو ب ھەموو شیانەک ل گەل داخواز و ئێش و ئازارێن وان دا مە. داخوازێ ژی ژ وان دکەم ل ناڤخوە دا یەکرێز بن و ھێڤیا وان ھەبیت و وان پشتراست دکەم ھەر تشتەک ل سەر بنگەھا زولم و خوەسەپاندنێ بیت دێ ھەر ب داوی هێت و ئەو رەوشا نەئاسایی و نەیاسایی یا نھا ل شنگالێ دا ھەیە ھەتا سەری نابیت و دڤێت خووشک و برایێن مەیێن ئێزدی ب سەربلندی ڤەگەرنە ل سەر مال و حالێن خوە.

مەسعوود بارزانی