دهێتە ئیدیعاکرن کو پەکەکێ ژ بۆ لاھۆر جەنگی پاسەوان شاندینە

دهێتە ئیدیعاکرن کو پەکەکێ ژ بۆ لاھۆر جەنگی پاسەوان شاندینە

ئاگاھیێن نوو یێن د دەربارا پەیوەندی و ھەڤدیتنێن د ناڤبەرا ھەڤسەرۆکێ بەرێ یێ یەنەکێ یێ ژ کار ھاتیە دوورخستن لاھۆر جەنگی و پەکەکێ دا د مەدیایێ دا تێن باسکرن. ھاتە ئیدیعاکرن کو پەکەکێ ژ بۆ لاھۆر جەنگی ھێزێن چەکدار شاندینە.

پەکەکێ د دەربارێ ئالۆزییێن د ناڤ یەنەکێ دا چ داخویانی د ئۆرگانێن خوە یێن فەرمی یێن مەدیایێ دا بەلاڤ نەکرینە. پەکەکێ ھەول دایە کو حەتا ئیرۆ بێ لایەن خوە دیار بکەت. لێ ھەر کەسێ کو د گۆرەپانا سیاسەتێ دابیت پەسەند دکەت کو رەوش ژ یا کو دیار گەلەک جوداترە. ب تایبەتی زانیاریێن تێنە بەلاڤکرن ڤێ یەکێ نیشان ددەن.

پەکەکێ ھێزێن چەکدار ژ بۆ لاھۆر شاندینە

ل داویێ، ھات ئیدیعاکرن کو پەکەکێ “هاریکاریا ئەولەھیێ” ژ بۆ لاھۆر جەنگی شاندیە، کەسێن دەورۆبەرێن لاھۆر جەنگی پشتی کو ھاتنە گرتن، دهێتە گۆتن کو ھەژمارا کەسێن چەکدارێن ل دۆرا وی کێم بوونە. ب سەر دا، پەکەکێ 4 تیمێن ژ 5 کەسان پێکهاتێ ئانکو یێکینەیەکا 20 کەسی شاندیە سلێمانییێ. ئەڤ گرۆپە ھەم ژ بۆ پاراستنا ئەولەھییا لاهۆر جەنگی چوونە، هەم ژی وەکو دیارکرنا ھەلوەستا پەکەکێ کو بێژن ئەم ل گەل تەداینە هاتیە شاندن. دهێتە ئیدیعاکرن کو، ئەڤ یەکینە ب فەرمانا جەمیل بایک ھاتییە شاندن.

چاڤدێرێن سیاسی یێن سلێمانیێ ئیدیعا دکەن کو ھێزێن ل کێلەکا لاھۆر جەنگی د دەما تەنگەزاریێ دا دێ دەست ژ بکارئانینا چەکان ل دژی پێشمەرگەیێن یەنەکێ بەردەن، لەوما ژی پەکەکێ پاراستنا لاھۆر جەنگی وەکو ئەرک ژ بۆ خوە پەسەند کریە.

پەکەکە پشتگریا مەعنەوی ددەتە لایەنگرێن لاھۆر جەنگی

سەدەمەکا دی یا کو پەکەکە پێشنیازەکا وەھا بکەت ئەوە کو پشتگریا خوە ژ بۆ لایەنگرێن لاھۆر جەنگی نیشان بدەت و مۆرالێ بدەتە وانا. ژ بەر کو ھەژمارا لایەنگرێن لاھۆر جەنگی رۆژ ب رۆژ کێم دبن. ھەژمارا کەسێن دوھی و ئیرۆ ل بەر مالا لاھۆر جەنگی کۆم بووی نەگەھشتنە 200 کەسان.

ل سەر ڤێ ھەڤگرتنا د ناڤبەرا لاھۆر جەنگی و پەکەکێ دا پرۆپاگاندا دهێنە کرن. لاھۆر جەنگی یێ کو ژ بەر دزی، گەندەلی و قاچاخچیتیا چەکان دهێتە دادگەهکرن، ژ بۆ لایەنگرێن کو دوھی ل بەر مالا وی کۆم بووی گۆتار ل سەر سیاسەتا ترکیایێ یا چەوساندنا ل دژی کوردان و زیندانیکرنا سەلاحەدین دەمیرتاش دان. خویایە کو لاھۆر جەنگی دخوازیت ب پرۆپاگانداکرنا رەوشا کوردێن رۆژئاڤا و باکورێ کوردستانێ ھەبوونا خوە بەردەوام بکەت. لێ  باکور ھێژتا کەچەلێ خوە دەرمان نەکرییە کو بشێت کەچەلێ لاھۆر ژی دەرمان بکەت.

پرۆپاگاندایێن لاینگرێن لاھۆر جەنگی

لایەنگرێن لاھۆر جەنگی پرۆپاگاندایێ دکەن کو پەکەکە و پەیەدە پشتگریێ ددەنە وان و دەما پیدڤی بکەت پەکەکە دێ ھێزێن لەشکەری ژی، ژ بۆ وان فرێکەت. ژ بەر ڤێ سەدەمێ، دهێتە گۆتن کو نوونەرێ جەمیل بایک ھاتیە جەم لاھۆر جەنگی و پشتگرییا خوە دییار کرییە. ھەر وەھا دهێتە نیقاشکرن کو پەکەکێ نوونەرێن خوە شاندینە جەم ھێرۆ تالابانی، کۆسرەت رەسوول و مەلا بەختیار ژی و گۆتیە وان ژی، “ئەم نەشێین قەبوول بکەین کو لاھۆر جەنگی ژ سیاسەتێ بهێتە دوور کرن”.

د ناڤبەرا لاھۆر جەنگی، حەشدا شەعبی و پەکەکێ دا رێکەفتنەکا ستراتەژیک ھەبوو کو ژ سالا 2014ێ و هێرڤە بەردەوامە. دهێتە زانین کو لاھۆر جەنگی د دەربارێ رێکەفتنا خیانەتێ یا کو وی ل گەل بەغدایێ دا د دەربارێ کەرکووکێ ئیمزا کری ژی پەکەکە پێشوەخت ئاگاھدار کریە و پەکەکێ ھێزێن خوە یێن ل داقووق و دوزخورماتو ب ترۆمبێلان بەرییا 6 دەمژمێران کو ئارتێشا ئیراقێ بکەڤیتە ھەرێمێ ڤەگوهاستن. دهێتە زانین کو لاھۆر جەنگی و پەکەکە د ناڤا ھەڤگری و شریکاتییەکا ستراتەژک تەڤدگەریان.