ژ دەما کو پێلا ڤەگەرێ بۆ عەفرینێ دەست پێ کریە، تا نھا ب سەدان مالباتێن کورد ڤەگەریانە سەر مال و مولکێن خوە و پشتا خوە دانە دەڤەرێن دەربدەریێ.
پێلا ڤەگەرێ ژ جەژنا قوربانێ دەست پێ کر، و تا رۆژا ئیرۆ دەربدەرێن عەفرینێ د رێیێن قاچاخ را خوە دگھینن مالێن خوە.
د ڤێ دەربارێ دا، ژێدەرەکێ ئاگاھدار دیار کر کو 160 مالبات ڤەگەریان و رەوشا خوە چارەسەر کرنە، یا ھەری داویێ 13 مالبات ب مەشێ و ل سەر لنگان ژ کامپێن شەھبایێ ڤەگەریابوون عەفرینێ.
عەفرین ژ 2018ێ ڤە کەتیە بن دەستێ تورکیێ و چەکداران دا، ژ بەر شەرێ عەفرینێ، ب دەھان ھەزاران مالباتێن کورد ژێ دەرکەتن و تا نھا بەشەک مەزن د کامپێن شەھبایێ دا نە، پەیەدێ ژی رێگریێ ل ڤەگەرا دەربدەران دکەت، ب بەھانەیا کو ئەو دێ عەفرینێ رزگار کەت.
لێ چاڤدێر تەکەز دکەن کو رەوشا عەفرینێ بیا سووریێ ڤە گرێدایی یە، لێ چارەسەرکرنا رەوشا دەمکی ب ڤەگەرا دەربدەر و پەنابەرانە، دا کو ھەر مالباتەک خوەدی ل مال و مولکێن خوە دەرکەڤیت و گوھارتنا دەمۆگرافی نەیێ چەسپاندن.
