سەرۆکێ ئەفغانستانێ ئەشرەف غەنی گۆت ئەو ئاخافتنێن لەزگین لگەل سەرکردەیێن خوەجھی و ھەڤبەندێن ناڤنەتەوەیی دکەت، د دەمەکێ دا کو چەکدارێن تالیبانێ نێزیکی کابولا پایتەخت دبن و وان باژارۆکەکێ باشوورێ کابولێ کۆنترۆل کریە.
غەنی د ئاخافتنەکا تەلەڤزیۆنی دا گۆت، “وەک سەرۆکێ وەلاتی، بالا من ل سەر نەهێلانا تووکچوونا سەقامگیریێ، توندووتووژیێ و دەربدەربوونا خەلکێ منە.”
ئاخافتنا غەنی د دەمەکێ دا یە کو ئەمریکا و ھندەک وەلاتێن دی ھێزان دشینن ناڤا ئەفغانستانی ژ بۆ دەرخستنا بەرپرس و کارمەندێن بالیۆزخانەیێن خوە.
غەنی بەرسڤا تالبانێ نەدا کو داخواز کربوون ل بەرامبەر ئاگربەستەکێ ژ بۆ ئاخافتن و لھەڤکرنەکێ ئەو دەست ژ کار بەردەت.
غەنی گۆت کو “تەڤلێکرنا ھێزێن بەرەڤانی و ئەولەکاریێ خەما وانا سەرەکەیی و پیڤانێن رژد د ڤێ دەربارێ دا دهێنە دانان.”
بەری ئاخافتنا غەنی، ل گۆر ئەندامەکێ جڤاتا خوەجھییا پارێزگەھێ، ب دەمەکێ کورت تالیبانێ پول-ە-ئالام پایتەختێ پارێزگەھا لۆگار کو دکەڤیتە 70 کیلۆمەتریا باشووری کابولێ کۆنترۆل کریە.
ئەندامێ جڤاتێ یێ کو نەخواست ناڤێ خوە ئاشکەرا بکەت ژ بۆ ئاژانسا رویتەرسێ گۆت کو تالیبان راستی هیچ بەرخوەدانەکێ نەھاتن.
کۆنترۆلکرنا باژارۆکێ پول-ە-ئالام رۆژەکێ پشتی پێشکەتنا تالیبانی د مەزنترین سێیەمین و دویەمین باژارێن ئەفغانستانێ دهێت.
