یەکینەیێن پاراستنا گەل (یەپەگە – باسکێ پەکەکێ ل رۆژئاڤا) راگھاند کو هێزێن وان چ پەیوەندی ب تۆپبارانا دوھی ل سەر باژارێ عەفرینێ ڤە نینە.
دوھی ناڤەندا باژارێ عەفرینێ ب مووشەکان ھاتبوو تۆپبارانکرن و ترکیێ ھێزێن یەکینەیێن پاراستنا گەل (یەپەگە) ب تۆپبارانا ل سەر باژێری، تۆھمەتبار کربوو.
ناڤەندا راگھاندنێ یا یەپەگێ داخویانیەکا نڤیسکی وەشاند و تێکلیا ھێزێن خوە ب وێ تۆپبارانێ رەد کر.
د داخویانیێ دا ھات دیارکرن: “مە چ پەیوەندی ب بوویەرا کو دوھی ل عەفرینێ چێبووی، نینە. تەڤی کو مە گەلەک جاران دا خویاکرن کو ل ھەرێما ناڤبۆری چ ھێزێن مە نینن ژی، دەولەتا ترک ھەر دەم ھەول ددەت بوویەرێن ل ڤێ ھەرێمێ دقەومن، باڤێژیت سەر مە. نووچە و ئیدیعایێن ب ڤی ئاوایی دووری راستیێ نە.”
دوھی دەردۆرا دەمژمێر 14:30 ھەژمارەک مووشەک ل ناڤا باژارێ عەفرینێ ل تاخا سڤیلان و ل بەنزینەخانەیەکێ کەتن و ئاگر ب بەنزینخانەیێ کەت.
د ئەنجاما کەتنا مووشەکان دا، 3 کەسان ژیانا خوە ژ دەست دان، کو د ناڤ وان دا ژن و زارۆک ژی ھەبوون و 4 کەس ژی بریندار بوون.
