ئەندامێ پارلامەنتۆیا کوردستانێ بەھمەن کاک عەبدوللا رادگھینیت، باش دیار بوویە کو پەکەکە خزمەتا ئەجیندایێن داگیرکەران دکەت و نھا بوویە دوژمنێ ئەولەھی و ئارامیا ھەرێما کوردستانێ.
ئەندامێ پارلامەنتۆیا کوردستانێ بەھمەن کاک عەبدوللا ژ K24ێ را راگھاند، “پەکەکە خاکا ھەرێما کوردستانێ رادەستی وەلاتێن جیران دکەت. مخابن، پەکەکێ خوە وەک دژمنەکێ ھەرێما کوردستانێ یێ ئاشکەرا دیار کریە. دانانا TNT ل سەر ریا پێشمەرگە ژ ئالیێ پەکەکێ ڤە، نە جارا یەکەمە و نە جارا داوییە ژی. دەستێ پەکەکێ ب خوینا پێشمەرگە سۆر بوویە و ب نەحەقی وان ل سەر ئاخا وان شەھید دکەت.”
تەکەز کر ژی، “پەکەکێ TNT ل سەر ریا ئارتێشا ترکیێ نەچاندیە. د راستیێ دا ژی، شەرێ ئارتێشا ترکیێ ژی ناکەت، ژ بەر وێ مە ھەست ب وێ کریە کو پەکەکێ شەر کر، تا کو عەفرینێ رادەستی ترکیێ بکەت، پشتی رادەستکرنێ ژی، یەک گولـلە د روویێ ئارتێشا ترکیێ دا ل عەفرینێ نەتەقاندیە. ل رۆژئاڤایێ کوردستانێ 300 ک.م سنۆرێ وان ل گەل ترکیێ دا ھەیە، ھەتا نھا تەقە ل ئارتێشا ترکیێ نەکریە.”
وی ئەندامێ پارلامەنتۆیا کوردستانێ گۆت ژی: “پەکەکە خزمەتا ترکیێ دکەت. ترکیێ بچیتە چ جھی، پەکەکە ژ بۆی وێ وی جهی ڤالا دکەت. ئەوێ ل شنگالێ ژی دکەت، رێگرتنەکا مەزن ل همبەر جێبەجێکرنا رێکەفتنا شنگالێ دکەت. ئەوا کو رێکێ ژ بۆی ترکیێ خوەش دکەت کو شنگالێ بۆمبەباران بکەت ژی، پەکەکە ب خوەیە.”
