ل ستەنبۆلێ رێڤەبەرێن ھەدەپێ ژی د ناڤ دا ھەری کێم 15 کەس ھاتنە گرتن و د ھەمان ئۆپەراسیۆنێ دا ل ئامەد، ئێلھ و موگلایێ ژی گەلەک کەس ھاتنە دەستەسەرکرن.
پۆلیسان ل ناڤچەیێن سولتانبەیل، سانجاکتەپە، ئەسەنیورت، سولتانگاز و کارتالێ یێن ستەنبۆلێ ب سەر گەلەک مالان دا گرت و ھەری کێم 15 کەس دەستەسەر کرن. د ناڤ دەستەسەرکریان دا رێڤەبرێن باژار و ناڤچەیێن ستەنبۆلێ یێن ھەدەپێ ژی ھەنە.
ل گۆر مەدیایا ترکیێ د ئۆپەراسیۆنا کو ل ستەنبۆل و ئامەد، ئێلھ و موگلایێ هاتیە ئەنجامدان ب تەڤاھی ٢٨ کەس ھاتن دەستەسەرکرن.
ل ستەنبۆلێ ئەلڤان ئوچار کۆردو، فەرھات یلدز، رەمەزان کون، ئایاتولله یاڤوز، ئەرۆل ئاکتاش، ڤەیسەل ئۆزداش، نزامەتتن ئاچک، مەتن بەیرەت، سوات یلدز، سالم بۆگا، بلال ئادگوزەل، بەدرەدین ئایتون، کەربەلا باکر، ئیسماعیل نەد و لکنور یوسوفۆگلو ھاتن دەستەسەرکرن.
ل گۆر ئاگاھیێن ھاتنە بەلاڤکرن، کەسێن ھاتنە دەستەسەرکرن بۆ ئیفادە دایینێ برنە رێڤەبەریا ئەولەھیا ستەنبۆلێ. ل گۆر مەدیایا ترکیێ دەربارێ 38 کەسان دا بریارا گرتنێ ھاتیە دایین.
