سەرۆک مەسعوود بارزانی ئیرۆ پەیامەک دەربارێ بوویەرێن ئەفغانستانێ و بەرامبەرکرنا د ناڤبەرا ھەرێما کوردستان و ئەفغانیستانێ دا کو ژ ئالیێ ھندەک کەس و مەدیایێ ڤە دهێتە کرن، بەلاڤ کر.
سەرۆک بارزانی د پەیاما خوە دا دبێژیت: “دخوازم خەلکێ کوردستانێ ژ وێ یەکێ پشتراست بکم کو رەوشا کوردستانێ جوداھیەکا زێدە ھەیە ل گەل ھەموو جھێن دی. سپاس ژ بۆ خوەدایێ مەزن، پێشمەرگەیێن مەیێن قەھرەمان و ھێزا مە ھەیە و ژ ھەموویان ژی گرنگتر، ئەم میلەتەکێ خوەدی ئیرادە و دۆزەکێینە.”
ھەروھا سەرۆک بارزانی دبێژیت: “ھەر کەسەک ژی بخوازیت بێھێڤی و خوە ب کێمزانین و بەرامبەریێن نەبجیھ ل ناڤ خەلکێ دا بەلاڤ بکەت، دیارە ھێشتا ژی نەکاریە ل ئیرادە و خوەراگریا گەلێ خوە تێبگھیت.”
پەیاما سەرۆک بارزانی وەھایە:
ب ناڤێ خوەدایێ مەزن و دلۆڤان
پشتی روودانێن ئەفغانستانێ ئەڤە چەند رۆژەکە گرۆپەکێ سیاسی و مەدیایی بەر ب دروستکرنا مەترسیێ و بێھێڤیێ ل ناڤ خەلکێ کوردستانێ دا کار ژ بۆ بەرامبەرکرنا د ناڤبەرا ھەرێما کوردستان و ئەفغانستانێ دکەن. ل ڤێرە دا پێویستە ھەموو ئالیەک باش بزانن کو ھەر میلەتەک ئەگەر پشت ب خوە و شیانێن خوە نەبەستیت ھەردەم ئەگەرا گەف و ل ناڤچوونێ ژی ل سەر ھەیە. پالپشتیا خەلکی ژی وی دەمی بھایێ خوە ھەیە و ب باندۆر دبیت کو ئەم ب خوە ھەبین و ئیرادەیا مە ھەبیت.
جوداھیەکا زێدە د ناڤبەرا ئەفغانستان و کوردستانێ دا ھەیە. جوداھیەکا زێدە ژی د ناڤبەرا پێشمەرگە و ئارتێشا ئەفغانستانێ دا ھەیە. پێشمەرگە زادەیێ دیرۆک و خوین و رۆندکێن گەلێ کوردستانێ یە. خوەدیێ سەدان دەستانێن دیرۆکی و قەھرەمانیێ یە. میناکێن دەستانا کۆرێ و تێکشکاندنا ئەفسانەیا داعش و داستانێن پردێ و سحێلا کو نەیارێن کوردستانێ پلانا وێ یەکێ ھەبوو ئیرادەیا گەلێ کوردستانێ بشکێنن، لێ بەلێ پێشمەرگە و گەلێ کوردستانێ ب خوەراگری و ئیرادەیا پۆلایی پلانا نەیار و دژمنان ھلوەشاند.
ل ڤێرە دا دخوازم خەلکێ کوردستانێ ژ وێ یەکێ پشتراست بکەم کو رەوشا کوردستانێ جوداھیەکا زێدە ھەیە ل گەل ھەموو جھێن دی. سپاس ژ بۆ خوەدایێ مەزن مە پێشمەرگەیێن قەھرەمان و ھێزا خوە ھەنە و ژ ھەموویان ژی گرنگتر میلەتەکین خوەدی ئیرادە و دۆزەکێ نە. ئەگەر دژمن و نەحەزان ژی خەیالا وان ھەبووبیت ئازارا خەلکێ کوردستانێ بدەن چ دەمەکێ ب ھێسانی ژ بۆ وان نەچوویە سەری و ب پشتراستی ڤە ل پاشەرۆژێ دا ژی ب ھێسانی ژ بۆ وان ناچیتە سەری. ھەر کەسەک ژی بخوازیت بێھێڤی و خوە ب کێمزانین و بەرامبەریێن نەبجیھ ل ناڤ خەلکێ دا بەلاڤ بکەت دیارە ھێشتا ژی نەکاریە ل ئیرادە و خوەراگریا گەلێ خوە تێبگەهیت.
مەسعوود بارزانی
22/8/2021
