چالاکڤانه‌كا ئێزدی: كچێن داعشێ رەڤاندین رزگار دبن، لێ یێن په‌كه‌كه‌ درەڤینیت نایێن ئازاد کرن

په‌كه‌كه‌-شنگال-دلڤین خه‌له‌ف-pkk-sincar

كچه‌كا چالاکڤان یا ئێزدی ئاشکەرا کر، چەکدارێن په‌كه‌كێ رەوشا شنگالێ تێکدانە و گەلەک كچێن بن تەمەن 18 سالی رەڤاندینە و چ په‌یوه‌ندییا وان ل گەل داییک و بابێ وان نەمایە.

چالاکڤانا ئێزدی دلڤین خەلەف بۆ باسنیوزێ راگەهاند، «هاتنا په‌كه‌كێ بۆ ناڤ شنگالێ تەنێ ژ بۆ وێ یەکێ یە کو باژار بۆ خەلکێ وێ نەمینیت و هەموو هەولدانا وان ئەوە كو ترکیە بهێته‌ ڤێ دەڤەرێ، ب راستی شنگال مه‌یدانا شەرێ په‌كه‌كێ نینە و بلا بچن باکورێ کوردستانێ کار بکه‌ن، بلا شەر و ئالۆزییان ڤەگوهێزنه‌ ناڤ ئاخا خوە، ژ بەر كو شنگال بەشەکە ژ ئاخا هەرێما کوردستانێ و ئێدی پێویست ناکەت په‌كه‌كه‌ ببیته‌ ئه‌گه‌را ئالۆزی و پرسگرێکان ل ده‌ڤه‌رێ».

چالاکڤانا ئێزدی گۆت: «په‌كه‌كێ دەست ژ باکورێ کوردستانێ بەردایە و هاتییە ناڤ شنگالێ بوویە سەرئێش و گەلەک پرسگرێکێن جڤاکی بۆ خەلکی چێکرینە، ب تایبەت رەڤاندن و بێسەرشوون کرنا كچێن ژێر تەمەنێ 18 سالی گه‌له‌ك زێدە بوویە، تشتێ کو په‌كه‌كه‌ دکەت ل دژی ئێزدیانە».

دلڤین خەلەف بۆ باسنیوزێ راگەهاند، «ئەو كچێن کو چووینە ناڤ په‌كه‌كێ چ یەک ژ وان ژی ب دلێ خوە نەچووینە، ژ ئالیێ په‌كه‌كێ ڤە هاتینە رەڤاندن و مه‌ژیێ وان شووشتنە، په‌كه‌كه‌ پرسگرێک و ئاستەنگە بۆ هەموو مالباتان، ژ بەر گەلەک كچێن بن تەمەنێ 18 سالیێ برینە فێرگەهێن خوە و مه‌ژیێ هەموویان تێکدانە و هەموو خاپاندنە و وه‌سا ل وان کرنە ئێدی ژ مرۆڤێن خوە دوور دکەڤن».

هەروه‌ها گۆت: «داییک و بابێن وان كچێن ژ ئالیێ په‌كه‌كێ ڤە هاتینە رەڤاندن، گەلەک جاران هەولدان زارۆکێن خوە ببینن، لێ په‌كه‌كێ ب چ ئاوایەکی رێ نەدا و ناهێلیت، ب راستی هێڤییا مە هەیە رەڤاندیێن دەست تیرۆریستێن داعشێ بهێنه‌ ئازاد کرن، لێ چ هێڤییا مە و باوەرییا مە ب وێ یەکێ نینه‌ کو ئەو كچێن په‌كه‌كێ رەڤاندینە جارەکا دی بهێنه‌ رزگار کرن و ب مالباتێن خوە شاد ببن».

دلڤین خەلەف گۆت: «زانیاریێن مە هەنە کو په‌كه‌كێ چ ب سەرێ وان كچان ئینایه‌، دا كو جارەکا دی نه‌شێن ڤەگەرن ناڤ مالبات و مرۆڤێن خوە، ئه‌ڤ كچه‌ ژ ئالیێ په‌كه‌كێ ڤە راستی زۆری و سته‌مێ هاتینە».

پوستێن ھەمان بەش