نڤیسکار و رۆشه‌نبیرێ کورد عه‌بدولره‌حمان ئونه‌ن وەفات کر

Abdurrahman Onen-kurd (2)

نڤیسکار، رەوشەنبیرێ به‌رنیاسێ كورد، عه‌بدولره‌حمان ئۆنەن ئیرۆ ژ بەر نەخوەشییا پەنجەشێرێ د 65 سالییا خوە دە کۆچا داویێ کر.

ئیرۆ رۆژا دوشه‌مبی 23/8/2021ان، نڤیسكار و رۆشه‌نبیرێ به‌رنیاسێ كورد عه‌بدولره‌حمان ئۆنه‌ن كۆچا داویێ كر كو ئه‌ڤ ده‌ما ساله‌كێ بوو ب په‌نجه‌شێرێ نه‌خوه‌ش كه‌تبوو و دهات ده‌رمان كرن، ئۆنەن ئیرۆ سەرێ سبێ ل نەخوەشخانەیا ئستنیە یا باژارێ ستەنبۆلێ کۆچا داوی کر.

مالباتا ئۆنه‌ن راگهاند كو بەرییا دو رۆژان ژ بەر تێکچوونا رەوشا خوە یا تەندروستیێ، ئۆنه‌ن ل نەخوەشخانەیا ئستنیە یا ستەنبۆلێ هاتبوو رازاندن و دهات دەرمانکرن.

هێژای گۆتنێ یه‌، ل گۆری مالباتا ئۆنه‌ن، هێژ نەهاتییە دیار کرن، کا جەنازەیێ عه‌بدولره‌حمان ئۆنەن دێ ل کودەرێ بێ ڤەشارتن.

عه‌بدولره‌حمان ئۆنەن کییە؟

  • ژ ناڤچەیا دێرکا چییایێ مازی یا مێردینێ یە.

  •  ل 24/2/1956ێ هاتییە دنێ.

  • دبستانا سەرەتایی و ناڤەندی ل دێرکێ و یا ئامادەیی ل مێردینێ، زانینگەهـ ژی ل ستەنبۆلێ ل فاکولتەیا وێژەیی، بەشا ئەردنگاریێ خوەندیە.

  • هەتا سالا 2008ان ل ستەنبۆلێ ل گەلەک دبستانان مامۆستەتیا ئەردنیگاریێ، ده‌رسا كورمانجیێ كرییه‌.

  • پرتووکێن وی ژ ئالیێ وەشانێن وەقفا ئیسمائیل بەشیکجی ڤە هاتنە چاپکرن و وەشاندن و ئارمانجا ئۆنه‌ن ئه‌ڤ بوو:

  • پێکانینا ئارشیڤ و پرتووکخانەیا پەروەردەیا ب کوردی.

  • وەرگەرا پرتووکێن دەرسان ژ بۆ تیپێن لاتینی.

  • خەباتێن ژ بۆ نڤیساندنا پرتووکێن دەرسێن کوردی.

  • د ڤێ چارچۆوەیێ دە، وی ژی بریار دایە کو ژ بۆ ئەردنیگارییا کوردستانێ بخەبتە دا کو وەک مامۆستەیەکی کورد کاربە دەرسا ئەردنیگارییێ ب کوردی بدە.

  • د ئەنجاما ڤان خەباتان دە، د سالا 2008ان دە پرتووکا وی یا ب ناڤێ فەرهەنگا ئەردنیگارییێ هاتیە وەشاندن.

  • ژ سالا 2013ان ڤە گەرا خوە یا ل کوردستانێ ددۆماند.

پوستێن ھەمان بەش