ل گوندێ سەرگەلێ یێ سەر ب قەزا ئامێدیێ ڤە، TNTیا کو چەکدارێن رێخستنا پەکەکێ ل سەر رێیا خەلکێ ڤی گوندی دانابوو ژ ئالیێ هێزێن پێسمەرگە ڤە هاتە پووچکرن و خەلکێ گوندی ژ ڤێ مەترسیێ رزگار کرن.
چاڤکانیێن پێگەها دارکا مازی ل قەزا ئامێدیێ راگهاند، ئیرۆ رۆژا دوشەمبی 23/8/2021ێ، هێزێن پێشمەرگە یێن کوردستانێ ل گوندێ سەرگەلێ یێ سەر ب ئامێدیێ ڤە کارین 30 کیلۆ TNTیا کو ژ لایێ چەکدارێن رێخستنا پەکەکێ ڤە ل سەر رێیا خەلکێ گوندێ سەرگەلێ هاتبوو دانان پووچ بکەن، ئەڤ رێیە رێیەکا ئاخێ یە و خەلکێ گوندی ژ بۆی چوون و هاتنا د ناڤا رەز و باخێن خوە ب کار تینن، ئانکو رێیەکە کو ب تەنێ خەلکێ گوندی ژ بۆی جۆتکاریێ ب کار تینن.
چاڤکانیێن مە هەر وەها ئاشکەرە کر، پشتی کو هێزێن پێشمەرگەیێن کوردستانێ ژ لایێ یەک ژ خەلکێ گوندی ڤە تێنە هایدارکرن کو چەکدارێن پەکەکێ ل سەر رێیا وان TNT دانایە، ل دەمژمێر 5ێ ئێڤاری هێزێن پێشمەرگە تیمەکا تایبەت ب پووچکرنا TNTیا شاندیە و کاریە وێ TNTیێ کو 30 کیلۆ بوویە پووچ بکەت.
پشتی کو پەکەکێ پرانیا ناڤچەیێن سنۆری یێن د ناڤبەر باکور و باشوورێ کوردستانێ رادەستی ئارتێشا ترکیێ کری نها هێزێن خوە ل نێزیکی گوند و باژارێن باشوور بجيهـ کرینە، ئەڤ یەک ژی بوویە سەدەما دروستکرنا ئالۆزیان، تەڤی کو خەلکێ باشوور داخوازێ ژ پەکەکێ دکەن چەکدارێن خوە نێزیکی گوندێن وان نەکەن، لێ بەلێ پەکەکە گوهنادەتە داخوازا وان و پتر نێزیک دبیت، پەکەکە ب ڤێ یەکێ ب تەنێ رازی نابیت و (تی ئێن تیێ) ژی ل سەر رێیا خەلکی ددانیت.
دهێتە زانین کو ئەڤە نە جارا یەکەمینە پەکەکە (تی ئێن تیێ) ل سەر رێیا گەلێ باشوور ددانیت، بەلکو پێش نها ژی چەندین جاران و ل هندەک ناڤچەیێن جودا ل سەر رێیا سڤیلا و هێزێن پێشمەرگەیێن کوردستانێ (تی ئێن تی) دانایە و بوویە سەدەما شەهیدکرن و بریندار کرنا گەلێ باشوور.
