وەزارەتا دەرڤەیا ئەمەریکا دبێژیت، پەکەکە و حەشدا شەعبی زارۆکان چەکدار دکەن و بۆ بەرژەوەندیێن خوە ددەنە شەرکرن.
وەزارەتا دەرڤەیا ئەمەریکا راپۆرتا خوە یا سالانە ل سەر چەکدارکرنا زارۆکان و بازرگانیکرن ب مرۆڤان بەلاڤ کر.
د راپۆرتێ دا ھاتیە گۆتن، ل ئیراقێ ژ بلی ھەرێما کوردستانێ، کۆمێن چەکدار، میلیشیایێن حەشدا شەعبی، داعش، کۆمێن گرێدایی پەکەکێ ل سەر رەڤاندن و چەکدارکرنا زارۆکان، بکارئانینا وان بۆ شەری، بکارئانینا وان ژ بۆ مەرتالێن مرۆڤی و بکوژ و خوەکوژ بەردەوامن.
د راپۆرتێ دا ھەر وەھا ھاتیە گۆتن، پەکەکە و یەپەگە زارۆکان چەکدار دکەن ب تایبەت ل دەڤەرێن سنۆری یێن ھەرێما کوردستانێ و شنگالێ ڤێ یەکێ دکەن.
ل گۆری راپۆرتێ، میلیشیایێن پەکەکێ ل شنگالێ تەنێ سالا 2018ێ ھەری کێم 20 زارۆک چەکدار کرنە و خستنە ناڤ شەری دا.
د راپۆرتێ دا ھاتیە گۆتن ژی، پەکەکە و یەکینەیێن پاراستنا شنگالێ (یەبەشە) گرێدایی پەکەکێ ژ سالا 2018ێ ڤە ھەتا نھا ب سەدان زارۆکێن ئێزیدی رەڤاندنە و چەکدار کرنە.
سازیێن جڤاکا سڤیل ژی دانە زانین، پەکەکە زارۆکێن شنگالێ و مەخموور ێو دەڤەرێن دی چەکدار دکەت و وان فێری شەری و کوشتنێ دکەت پاشێ دشینیت قەندیلێ، شنگالێ و دەڤەرێن سنۆری یێن ھەرێما کوردستان، ئیران و ترکیێ.
