چەکدارێن جوانێن شۆرەشگەریێن سەر ب پەکەکێ ڤە رۆژانە زارۆک و جوانێن ژێر 18 سالی ل رۆژئاڤایێ کوردستانێ درەڤینن دا کو تەڤلی خولێن پەروەردەیا لەشکەری بکەن و پشترا تەڤلی شەرێن ب وەکالەت بکەن.
چالاکڤانێن کورد ل سەر تۆرێن جڤاکی ئاشکەرا کرن کو ژ 24 تیرمەھا بووری ڤە، زارۆکێ کوردیێ ب ناڤێ وایل ئەدنان ئیبراھیم کو ژداییکبوویێ 2007ێ یە، واتە ب تەنێ 14 سالی یە ژ ئالیێ چەکدارێن پەکەکێ ڤە ھاتیە رەڤاندن و ژ بۆ ناڤەندەکا لەشکەری ل قامشلۆ ھاتیە برن.
ھەمان ژێدەران ئاماژە ب وێ یەکێ دان کو ژ دەما ئەو زارۆک ھاتیە رەڤاندن، مالبات ھەول ددەت چارەنڤیسا وی دیار بکەن، لێ وان ھەولان سەرنەگرت و تا نھا چ ئاگاھی و زانیاری ل سەر نینە.
ھەر د ڤێ دەربارێ دا، چەکدارێن پەیەدێ ل کامپێن کۆچبەرکریێن عەفرینێ ل شاھبایێ، فاتیمە ئیدریس نەسان، ژ گوندێ قژوومایێ عەفرینێ، رەڤاند.
باڤێ زارۆکا ناڤبوور د بانگا خوە دە ئانیبوو زمان کو بەرپرسێن پەیەدێ گوھ نادەنە وی، و گەفان دکەن و دبێژن تشتەکێ ل سەر نزانن ئەگەر ل جەم وان بیت ژی ڤەناگەرینن.
ئیدریس نەسان ھەوارا خوە گھاند فەرماندارێ قەسەدێ مەزلووم کۆبانێ و گۆت ل شەھبایێ گەلەک خیانەت چێ دبن، و تەڤی رووبروویێ مووشەک و رەوشا رۆژانە یا خەراب دبن، د سەر وێ زەحمەتی و ئاستەنگیان ژی راستی رەڤاندنێ تێن.
ئەڤ یەک د دەمەکێ دایە کو قەسەدێ رێکەفتنەک لگەل نەتەوێن یەکگرتی د سالا 2019ێ دا ئیمزا کریە، تەڤی وێ یەکێ رۆژانە رەوشێن رەڤاندنا زارۆکان تێنە تۆمارکرن و بەلگەکرن.
