خواستن ژ زیندانا پەکەکێ برەڤن لێ هاتنە گرتن

خواستن ژ زیندانا پەکەکێ برەڤن لێ هاتنە گرتن

هاتە زانین کو 3 گەنجێن کورد دەما ژ کامپا مەخموورێ یا د بن دەستهلاتداریا پەکەکێ دا رڤیای، ژ لایێ سوپایێ ئیراقێ ڤە تێنە گرتن، پشترا رادەستی پەکەکێ تێنە کرن.

چاڤکانیێن پێگەها دارکا مازی ل باشوورێ کوردستانێ ئاشکەرا کر، هێزێن سوپایێ ئیراقێ ل رۆژا 10/7/2021ێ، کارینە 3 کەسان دەستەسەر بکەن کو دو ژ وان کەچ و یەک دی کور بوویە، هیچ یەک ژ ڤان کەسان ناسنامە گەلدا نەبوویە، پشتی کو لێکۆلین لگەل وان دهێتە کرن ئیتیرافێ دکەن کو ل کامپا مەخموورێ یا د بن دەستهلاتا پەکەکێ دا رەڤیانە و خواستیە بچن ناڤا مالباتێن خوە دا. هەر وەها هاتیە زانین کو ئەڤ کەسە خەلکێ رۆژئاڤایێ کوردستانێ نە.

چاڤکانیێن پێگەها دارکا مازی، ناسنامەیا ڤان کەسان ب ڤی ئاوایی دانە ناساندن؛ «بارین خەلیل عەلی» کو د ناڤا رێخستنا پەکەکێ دا ب «جوان نایف تاهر» دهێتە ناسکرن، «نەسرین سەلاح شندین» کو د ناڤا پەکەکێ دا ب «فەراشین سەلاح شندین » دهێتە ناسکرن و «محەمەد حاجی» کو ب کۆد ناڤێ «زنار محەمەد ئەمین» دهێتە ناسکرن.

د دەما لێکۆلینێ دا ڤان سێ کەسا دانپیدان کریە کو  ل سالا 2014ێ، د ژییێ 11-13 سالییێ دا ئەو ل قۆتابخانەیێن رمێلان و سەرێ کانیێ و قامشلۆ ژ لایێ پەکەکێ ڤە هاتنە رەڤاند، پشترا ئەو ژ بۆی پەروەردەهیێ هاتنە شاندن ژ بۆی جیهێن پەروەردەهیا لەشکری کو پەکەکێ ل رۆژئاڤایێ کوردستانێ ژ بۆی چەکدارکرن و پەروەردەیا لەشکری ژ  بۆ زارۆکان ئاڤا کرینە.

چاڤکانیێن پێگەها دارکا مازی هەر وەها ئاشکەرا کریە، پشتی کو ژ لایێ رایەدارێن لەشکەری یێن سوپایێ ئیراقێ پەیوەندی ب مالباتێن ڤان جوانێن کورد هاتیە کرن، مالباتێن وان تەکەز کریە کو د سالا 2014ێ دا زارۆکێن وان ژ لایێ پەکەکێ ڤە هاتنە رەڤاندن و پشترا هیچ زانیاریەک ژ وان نەزانیە، ژ بەر کو پەکەکێ رێ ب وان نەدایە پەیوەندیێ ب مالباتێن خوە بکەن، هەر وەها چ زانیاری ب مالباتێن وان ژی نەداینە.

سوپایێ ئیراقێ دخواست ڤان جوانان رادەستی مالباتێن وان بکەن، لێ بەلێ پشتی تەداخولا عەمید روکن «ئدریس» کو بەرپرسەک سەربازی یە ل مەخموورێ و سەر ب ئێکەتییا نیشتیمانی یا کوردستانێ “یەنەکێ” یە، پەیوەندی ب بەرپرسا تێکلیێن کامپا مەخموورێ یا ب ناڤێ «حنیفا مستەفا محەمەد» ب کۆد ناڤێ «عایشا» دهێتە کرن و هەر سێ جوانێن کو دخواست ژ پەکەکێ رزگار ببن جارەکا دی رادەستی پەکەکێ هاتنە کرن.

دهێتە زانین کو پەکەکە ژ دەستپێکا دامەزراندنا خوە هەیا نها بەردەوامە ل سەر رەڤاندنا زارۆکێن کورد و چەکدارکرنا وان، تەڤی کو ئەڤ یەک بوویە سەدەما رەخنەکرنا پەکەکێ ژ لایێ ناڤخوەیی و نانڤنەتەوی، لێ بەلێ پەکەکە بەردەوامە ل سەر رەڤاندنا زارۆکان و ب زۆر چەکدارکرنا وان، هەری داوی وەزارەتا دەرڤە یا ئامەریکایێ د راپۆرا خوە یا سالانە دا ئاماژە ب ڤێ یەکێ کریە و راگهاندیە کو پەکەکە بەردەوام زارۆکان درەڤینیت و ب زۆرێ وان چەکدار دکەت.

پوستێن ھەمان بەش