قه‌ومی.. بافل ئه‌ولادێن شێخ جه‌نگی ته‌ڕا و به‌ڕا كرن!!

لێكۆلین و ته‌عقیبا بافل تاله‌بانی، ل سه‌ر مولك و سامانێ ئه‌ولادێن شێخ جه‌نگی به‌رده‌وامه‌، هه‌ری داوی بافل ده‌ستێ خوه‌ دانا سه‌ر هه‌موو مولك و سامانێ وان یێ ل به‌غدایێ، ئاراس شێخ جه‌نگی برایێ لاهور ژی ل به‌غدایێ ژ به‌ر بافل ره‌ڤیایه‌.

پێگه‌ها «داركا مازی» ئاگاهیێن هه‌ری تایبه‌ت ل ده‌ربارا جه‌نگا بافل تاله‌بانی ل سه‌ر مولك و سامانێ لاهور شێخ جه‌نگی هه‌ڤسه‌رۆكێ ده‌رێخستی یێ یه‌نه‌كێ ب ده‌ست ئێخستنه‌ و كانێ ب چ ئاوایی ل به‌غدایێ ده‌ستێ خوه‌ دانایه‌ سه‌ر كۆچك و ڤێلایێن ئه‌ولادێن شێخ جه‌نگی.

ڤێلایا لاهور یا ل نێزیكی كۆچكا سه‌رۆكاتیێ بر

چاڤكانیێن پێگه‌ها مه‌ ل به‌غدایێ ده‌ست نیشان كرنه‌ كو ل رۆژا 7/8/2021ێ، بافل تاله‌بانی به‌رپرسێ كارگێریێ یێ كۆچكا جه‌لال تاله‌بانی ل به‌غدا یا پایته‌ختا ئیراقێ ئه‌ركدار كر كو ته‌عقیبا مولك و سامانێ ئه‌ولادێن شێخ جه‌نگی و تایبه‌ت یێن لاهور ل به‌غدایێ بكه‌ت.

به‌رپرسێ كۆچكێن جه‌لال تاله‌بانی كو ناڤێ وی دلشاده‌ و ب كۆد ناڤێ «دلشاد ئیداره‌» تێ ناس كرن، ل هه‌مان رۆژێ سه‌ره‌دانا عه‌مید «سالار حه‌مه‌ خان» فه‌رماندارێ لیوایا 2 یا سه‌رۆكاتییا كۆمارێ كرییه‌ و گۆتیێ‌: «فه‌رمانا بافل د گه‌ل من دا یه‌، ئه‌ز دخوازم هه‌ر چ ئاگاهییه‌كا‌ هه‌وه‌ ل ده‌ربارا مولك و سامانێ ئه‌ولادێن شێخ جه‌نگی هه‌بن بده‌ن، سه‌رۆك بافل فه‌رمان دایه‌ ئه‌ڤ مولك بهێنه‌ گرتن».

ئاراس ره‌ڤییه‌ و چوویه‌ جه‌م هه‌رێم كه‌مال ئاغای

چاڤكانیێن مه‌ ده‌ست نیشان كرنه‌، ل رۆژا 2/8/2021ێ ژی، هه‌ر ب فه‌رمانا بافل تاله‌بانی فه‌وجه‌كا عه‌سكه‌ری یا گریدای سكرتارییا تایبه‌ت یا مالا جه‌لال تاله‌بانی ل به‌غدایێ برییه‌ سه‌ر كۆچكا لاهور شێخ جه‌نگی ل ناڤچه‌یا جادریێ كو دكه‌ڤیته‌ د چارگۆشه‌یا سه‌رۆكاتییا كۆمارێ دا.

ئاگاهیێن كو گه‌هشتینه‌ پێگه‌ها مه‌ دیار كرینه‌ كو ل وه‌ختا گه‌هشتنا وێ فه‌وجا عه‌سكه‌ری، ئاراس شێخ جه‌نگی برایێ لاهور ل گه‌ل 8 زێره‌ڤانێن گرێدای لاهور د وێ كۆچكێ دا بوون، لێ به‌لێ ئاراس ب زێره‌ڤانێن لاهور ڤه‌ ره‌ڤیا، ئاراس په‌نا بۆ «هه‌رێم كه‌مال ئاغا» و «فه‌ریق سمكۆ» هاریكارێ وه‌كیلێ وه‌زاره‌تا ناڤخوه‌ بر و ل جهێ ڤه‌حه‌ویانا وان ل ناڤچه‌یا جادریێ ما.

هێژای گۆتنێ یه‌، ژ رۆژا 8 مه‌ها رابووری ڤه‌، بافل تاله‌بانی و قوباد تاله‌بانی لاهور جه‌نگی ژ ناڤ رێزێن یه‌نه‌كێ ده‌رێخستییه‌ و بێ باندۆر كرییه‌، نها ژی بافل تاله‌بانی خواستییه‌ لاهور جه‌نگی ژ هه‌رێما كوردستانێ ده‌ركه‌ڤیت و به‌رییا نها ده‌م ژ بۆی وی ده‌ست نیشا كربوو ژ بۆ كو ده‌ربكه‌ڤیت.