مەسروور بارزانی: هه‌ولێن مه‌ ژ بۆ ناسكرنا جینۆسایدا ئەنفالێ به‌رده‌وامن

سەرۆکوەزیرێ هەرێما کوردستانێ مەسروور بارزانی د 33 مین سالڤەگەرا پرۆسەیا ئەنفالا به‌هدینانێ دە پەیامەک بەلاڤ کر و تێدە راگهاند، پێویستە حکوومەتا ئیراقێ کەسوکارێن قوربانیێن تاوانا جینۆسایدا ئەنفالێ قەرەبوو بکەت.

پەیاما سەرۆکوەزیرێ هەرێما کوردستانێ:

د 33 سالییا ئەنفالا به‌هدینانێ دا، ئەم قوربانیێن ڤێ تاوانا هۆڤانە ب رێزداری ببیر تینن کو د قۆناغا داوی یا ئەنفالان دا، رەژیما بەعس یا ئیراقێ دەست ب پرۆسەیا ئەنفالان ل به‌هدینان کر و د ئەنجامێ دا، ب هەزاران مرۆڤێن بێگونەهـ ژ پێکهاتەیێن جودا یێن هەرێمێ هاتن شەهیدکرن و ونداکرن، ب سەدان گوند هاتن وێرانکرن و ب دەهان هەزار کەس ژی کۆچبەر و دەربدەر کرن.

د ڤێ بیرانینا خەمگین دا، جارەکا دن تەکەز دکه‌ن کو پێویستە حکوومەتا ئیراقێ کەسوکارێن قوربانیێن تاوانا جینۆسایدا ئەنفالێ قەرەبوو بکەت. ئەم د هەولێن خوە دە ژی بەردەوام دبن ژ بۆ ناسکرنا جینۆسایدا ئەنفالێ ژ ئالیێ جڤاکا ناڤدەولەتی ڤە، هەروها حکوومەتا هەرێما کوردستانێ، پابەندبوونا خوە ب خزمەتکرنا زێدەتر یا کەسوکارێن شەهید و ئەنفالکرییان دوبارە دکەت.

رێز ژ بۆ گیانێن پاکێن قوربانیێن جینۆسایدا ئەنفالان و هەموو شەهیدێن کوردستانێ.