په‌كه‌كه ب دارێ زۆرێ باجێ ژ جۆتكار و بازرگانێن ئاژه‌لان دستینیت
چه‌كدارێن په‌كه‌كێ ل سینۆرێ پارێزگه‌ها سلێمانیێ یا باشوورێ كوردستانێ، ره‌وشا جۆتكار و بازرگانێن ئاژه‌لان پڕ خه‌راب كرییه و ب دارێ زۆرێ باجێ ژ وان و گه‌لێ هه‌ژار دستینه، ل سه‌ر نه‌دانا باجێ ژی گوللـه به‌ردانه بازرگانه‌كی.
پێگه‌ها باسنیوز ئیرۆ رۆژا پێنجشه‌مبێ 26/8/2021ێ به‌لاڤ كرییه، چەکدارێن په‌كه‌كێ ل گوندێن ناڤچەیا شارباژێر یا سلێمانیێ و گوندێن چەمێ شلێرێ سەر ب قەزا پێنجوێن و چەند باژارۆک و گوندێن دن یێن هەرێما باشوورێ کوردستانێ، ب ئاشکەرایی خوە تێکەلی خەلکێ سڤیل دکه‌ن و باجێ ژ خەلکێ هەژار دستینن، ئەو زێدەگاڤیێن په‌كه‌كێ ژی خەلکێ وان ناڤچەیان بێزار کرییە.
ده‌ست نیشان كر، د مەها تیرمەهێ دا ل گوندێ زەلێ یا سەر ب باژارۆکێ هەلشۆ، چەکدارێن رێخستنا په‌كه‌كێ رێ ل هەموەلاتییەکی ب ناڤێ فەقێ ئه‌حمەد گرتن کو بازرگانییا ئاژه‌لان دکر و داخوازا گۆمرکێ ژێ کرن، لێ وی رەد کر کو باجێ بدەته چەکدارێن په‌كه‌كێ و وان ژی گوللـە بەردانێ و ئەو بریندار کرن.
د ڤێ ده‌ربارێ ده، پارێزەر و شرۆڤەکارێ سیاسی شاباز سیوەیلی ژ باسنیوزێ را گۆتییه: هەر چەنده هەرێما کوردستانێ رێزەکا مەزن ل وان دگریت ژی، لێ چەکدارێن په‌كه‌كێ وەکی کو داگیرکەر بن، ره‌فتارێ ب گه‌لێ باشوور دكه‌ن، ئه‌و بەردەوام دانوستانەکا کرێت ل گەل خەلکێ سڤیل دکه‌ن، ب تایبەت کەسێن کو کارێن کشتوکال و جۆتکاریێ دكه‌ن، هه‌روه‌ها باجێ ژ خەلکێ ئاسایی و هه‌ژار وەردگرن.
شاباز سیوەیلی گۆت: په‌كه‌كه ل گۆر بەرژەوەندییا دەرەکی یا دژی کوردان کار دکەت و دانوستانەکا کرێت ل گەل هەرێما کوردستانێ دکەت، جهێن پێشمەرگەی داگیر دکه‌ن و پشتره نكارن وان جهان بپارێزن و ژ بۆ تركیێ ڤالا دکن، ناها دەولەتا ترکیێ ژ بەر په‌كه‌كێ 40 کیلۆمەترەیان کەتییە ناڤ کووراهییا ئاخا هەرێما کوردستانێ دا.
هه‌روه‌ها گۆت: په‌كه‌كه خوە وەک هێزەکی کوردی دزانیت، لێ هەتا ناها گوندەکی باکورێ کوردستانێ ژی ئازاد نەکرییە، ته‌نێ زیانێ دگەهینە هەرێما کوردستانێ، ژ بەر وێ په‌كه‌ك بەردەوام دژمنێ ناڤخوە بوویە و به‌هانەیان ددەته ئارتێشا ترکیێ کو ئاخا هەرێما کوردستانێ داگیر بکەت.
ژ ئالیێ دن ڤە جیگرێ بەرێ یێ بەرپرسێ مالبەندا شارەزوور یێ یه‌نه‌كێ ئەحمەد قەدەفەری ژی ژ باسنیوزێ را راگەهاند: چەکدارێن په‌كه‌كێ ب چەک ڤه دگەرن و گومرکێ ژ خەلکێ دستینن، ئەم ژی نکارن چارە بکه‌ن، ئەو ب گۆتنێن خوەش نایێن چ رێیەکی، باشە ما ئەم چ بکه‌ن، خوە ئەم شەری ل گەل وان ناکه‌ن؟!
هەروه‌ها دیار کر، پێویستە په‌كه‌كه د ناڤبەرا دو هەلبژاردەیان دە یەک ژ وان هەلبژێرە، یان بێدەنگی دێ روونێ هەتا حکوومەتا هەرێما کوردستانێ بکاریت ئالیكارییا مرۆڤی ل گەل وان بکە، یان ژی دێ بچن بۆ ترکیێ و ل وێ دەرێ چ دکه‌ن بلا بکه‌ن.
