ل داقۆقێ 4 کارکەر د تەقینەکێ دا هاتن کوشتن و بریندارکرن
ل باژارێ داقوقێ یێ ل باشوورێ کەرکووکێ، د ئەنجاما تەقینا بۆمبەیەکا ڤەدایی دا، کارکەرەک هات کوشتن و 3 کارکەرێن دی ژی بریندار بوون.
قایمەقامێ داقۆقێ لویس فەندی ژ كوردستان 24ێ را راگه‌هاند، ل گوندێ سەمادێ یێ ل باشوورێ داقوقێ ئیرۆ دانێ سبێ دەما هەژمارەک ژ کارکەران چوون سەر کارێ خوە ل پرۆژەیەکێ، بۆمبەیەکا ڤەدایی تەقیا و کارکەرەک هات کوشتن و 3 کارکەرێن دی ژی ب گرانی بریندار بوون.
قایمەقامێ داقوقێ گۆت ژی: «ژ بەر هەبوونا ڤالاهییا ئەولەهیێ ل هەرێما مە، داعش سوودێ ژێ دبینیت و کریارێن تەرۆریستی ئەنجام ددەت».
پشتی بوویەرێن 16ێ جۆتمەها 2017ێ و ڤه‌كێشانا هێزێن پێشمەرگەی، ڤالاهیەکا ئەولەهیێ ل ناڤچەیێن کوردستانی یێن ل دەرڤەیی ئیدارەیا هەرێما کوردستانێ دروست بوویە، ڤێ یەکێ ژی هشتیە چەکدارێن داعشێ ل وان ناڤچەیان چالاکیێن خوە زێدە بکه‌ن و ئێریشی سەر وەلاتیان و هێزێن ئەولەهیێ بکه‌ن.
باژارۆکێ داقوقێ 40 كیلۆمه‌تران ل باشوورێ کەرکووکێ یه، ل گۆر سەرژمێریا سالا 1947ێ، رێژه‌یا کوردان لێ ژ سەدی 60 بوو، پرانیا وان ژی کوردێن کاکه‌یی نە، ژ بلی کوردان، عەرەب و ترکمەن ژی لێ هەنە.
