ھەڤسەرۆکێ یەکیتیا نشتمانی یا کوردستانێ (یەنەکێ) بافل تالەبانی د ھەڤپەیڤینەکێ دا ل گەل مەدیایێن ھەرێما کوردستانێ، راگھاند، بەلگەیا د دەستێ وی دا ھەنە کو ھاتیە ژەھرخوارکرن و گۆت، پزیشکان گۆتیە وی، “تو چاوا مایی؟”
پەیامنێرێ رووداوێ دبێژیت، بافل تالەبانی گۆت، “پزیشکان گۆتیە من، تو چاوا مایی ساخ؟ ئەڤ ژەھریکرن ب جورەکێ بوویە کو تو د دەمەکێ کورت دا نەمینی و تە چاوا تەحەمول کریە؟ ” و وی د بەرسڤا دخۆری دا گۆتیە، “بەرگریا لەشێ من بھێزە و وەرزشێ دکم.”
ئەرکان عەلی دبێژیت، ژ بافل تالەبانی پرسیار کریە کا بەلگە وی ھەنە دەربارێ ژەھریکرنێ دا؟ و ھەڤسەرۆکێ یەنەکێ ژی گۆتیە، “بەلێ، بەلگە د دەستێ من دا ھەنە، ھەم پشکنینا ناڤخوەیی و ھەم پشکنینا دەرەکی و رووسی ژی ھەیە کو ئەز ھاتمە ژەھریکرن. دانپیدان، ڤیدیۆ و کۆمەلەک بەلگەیێن دی ژی ھەنە.”
ل سەر پرسیارا کا بۆچی وان بەلگەیان بەلاڤ ناکەت، بافل تالەبانی ژ پەیامنێرێ رووداوێ را راگھاند، چاڤەرێیی دادگەھێ دکەت و ھێژتا ژی یەک ئالی نەبوویە کو دادگەھا ناڤخوە بیت یان ژی ل دەرڤە سکالایێ تۆمار بکەت و بەلگەیان ئاشکەرا بکەت.
دەربارێ وێ پێشنیارا بۆ لاھوور شێخ جەنگی ژی کو ھەرێما کوردستانێ بجھ بھێلیت، بافل تالەبانی گۆت، “من ئەو پێشنیاز نەکریە و وی ب خوە داخواز کریە، ھەروھا داخواز کریە ژ ئالیێ ئۆرگانێن رەسمی یێن یەنەکێ ڤە ئەو پێشنیار بهێتە کرن کو 104 ئیمزایێن سەرکردەیان ل بەر بێنە دانین کو تێدا داخواز ژێ بهێتە کرن ھەرێما کوردستانێ بجھ بھێلیت. من و بەرھەم سالح، وەک سەرۆکۆمار، مە ئیمزا نەکر. من گۆتە وی، کوردستانێ بجیهـ ناھێلی، بێدەنگ روونە و بەشداری بانگەشەیێن ھلبژارتنێ ژی نابی.”
