چالاکڤانێ سڤیل ل رۆژئاڤایێ کوردستانێ رادگەھینیت کو پارتیا کارکەرێن کوردستانێ (پەکەکە) رێ نادەت کۆچبەرێن باژارێ عەفرینێ ڤەگەرنە سەر مال و حالێن خوە.
چالاکڤانێ سیاسی مستەفا شێخۆ ژ بۆی باس نیوسێ راگەھاند: خەلکێ کۆچبەرێ عەفرینێ یێ کو ناڤ چادر و کۆنان دا ل شەھبا و رۆژھلاتێ فراتێ نشتەجیھ بوونە، ھەولا ڤەگەرا سەر مال و حالێن خوە ددەن، لێ پەکەکە رێ نادەت وان.
مستەفا شێخۆ راگەھاند: “پەکەکە ھەم رێ ل ڤەگەرا کۆچبەران دگریت، ھەم ژی پشتەڤانیا ناڤنەتەوی ژ بۆ وان کۆچبەرا دکەت، لێ چ پشتراستی، سەقامگری و ئاساییش د ناڤچەیێن بن دەستھلاتا پەکەکێ دا ھەیە؟”
مستەفا شێخۆ گۆت، پەکەکێ ڤێ داویێ 22 زارۆکێن کەچ و کور رەڤاندنە و ئەو شاندنە لەشکەرگەھان. ژ وان ژی کاوە بریمۆ، جوان ھەبەشێن کۆچبەرێن عەفرینێ، فاتیمە ئدریس نەسان ل تل رەفعەت و محەمەد ئیبراھیم جارۆ و گەلەکێن دن و ب ئەجێبمایی دپرسیت: “پەکەکە بەحسا کیژان جورێ پشتراستیێ دکەت؟ ئەو بخوە مەترسیا ھەری مەزنە ل سەر کوردان، ب تایبەت ژی ل رۆژئاڤایێ فراتێ.”
چالاکڤانێ سڤیل دبێژیت بەرەڤانیا راستەقینە د نشتمانی دا دهێتە کرن، نە کو ناڤا چادران دا و راگەھاند: ئارمانجا پەکەکێ یا هێلانا خەلکێ عەفرینێ د ناڤ چادران دا، ژ بۆ ڤێ یەکێ یە کو زارۆکێن وان ببەتە لەشکەرگەھان و وان بکەتە چەکدار و وان بەشداری ناڤ شەرێن خوە یێن شکەستی بکەت و ناڤچەیێ ژ خەلکێن رەسەن ڤالا بکەت و ڤان کاران ھەموویان ژ بۆ بەرژەوەندیا پێکھاتەیێن دی دکەت.”
مستەفا شێخۆ گۆت: “پێویستە خەلکێ عەفرینێ ل جیھێ کو چادرێن پەکەکێ دا بژین، ڤەگەریتە ناڤچەیا خوە، ژ بۆ کو ئەرد، باخ و خانی و تشتێن وان ژ بۆ وان بێنە ڤەگەراندن، یا راست ئەڤەیە.”
ژ ئالیێ دی ڤە نڤیسکار و ھەلبەستڤانێ کوردێ رۆژئاڤایێ کوردستانێ رۆنی عەلی د تۆرا خوەیا جڤاکی یا فەیسبۆکێ دا راگەھاند: “ئەوێ کو ڤەدگەریتە عەفرینێ نە ئەز و تو نە، ئەو کوردێ کێرێن یێن کو زولمێ دادقورتینین و رژدن ل سەر ڤەگەرێ.”
ھەروەھا چالاکڤانێ سیاسی یێ کوردێ رۆژئاڤایێ کوردستانێ ئەلیاس رەمۆ ژی د تۆرا خوەیا جڤاکی یا فەیسبۆکێ دا داخواز ژ خەلکێ کۆچبەر و دەربەدەرێ عەفرینێ کریە ڤەگەرنە سەر مال و خانیێن خوە، کو ئەو ڤەگەرە کارەکی قەھرەمانیێ یە و دژ راوەستانا داگیرکەریێ یە.
