دوھی ل سەر ناڤێ ھەپەگێ داخویانیەک ھاتە بەلاڤکرن. د داخویانیێ دا، ناسنامەیێن 6 گەریلایێن ل زەندوورا یا ھەرێما باشوورێ کوردستانێ ژیانا خوە ژ دەست داین، ھاتنە ئاشکەراکرن. د دەربارێ سەدەما گەریلایێن ژییانا خوە ژ دەست دایی  دا ژی ھندەک ئاگاھی ھەبوون. لێ د ناڤەرۆکا ئاگاھییان دا درەوێن مەزن هەبوون.

داخويانييا ھەپەگێ

ھەپەگێ د داخويانييا خوە دا پارتی دیمۆکراتی کوردستان و پێشمەرگە ب کوشتنا 6 گەریلایان تاوانبار کر. پەکەکێ ئیدیعا کر کو ژ بەر کو د 5ێ خزیرانێ دا پێشمەرگەیان ل مەتینا لۆتکەیا چارچەلی و گرێ ھەکاری گرتییە،  فەرمانداریا میحوەرێ مەتینا-خابوور ناچار مایە کو پلانێ بگوھریت. و ھەروھا ھەپەگە ئیدیعایی دکەت کو ژ بەر ڤێ یەکێ ئەو ناچار بوویە کو ھێزێن خوە ژ زەندوورا پاشڤە ڤەکێشیت و د ڤێ ڤەکێشانێ دا ڤان 6 گەریڵایان ژیانا خوە ژ دەست دانە.

لێ بەلێ، سەدەما ڤەکێشانا ڤان چەکداران نە پێشمەرگەیە و نە ژی بوویەرا کو ھاتیە بەحسکرن ب وی شێوازی یە. ل گەل ڤێ ژی، یێن ل گرێ ھەکاری ئێرش بری سەر پێشمەرگا و 5 پێشمەرگە شەھید کری پەکەکە ب خوە بوو. ھەپەگە ب نەزانینا جوگرافیێ مرۆڤان ژ بۆ خوە ب کار تینیت، دخوازیت تێکچوون و ونداھیێن خوە بێخیتە ستوویێ پێشمەرگێن کوردستانێ.

گەلییێ زەندوورا و گرێ ھەکاری ل کیژان دەڤەرێ نە

د ناڤبەرا زەندورا و گرێ ھەکاری دا هیچ پێوەندیەکا جوگرافی نینە. دەما کو ل گەلییێ زەندوورا شەر ھەبیت، ئەو دشێن ل گرێ ھەکاری چایێ ڤەخوون، دیلانێ بگرن و هتد… ژ بەرکو دەنگێ گولـلەیان ناگەهیتە سەرێ مەتینا. دووراھیا د ناڤبەرا ڤان  ھەر دو دەڤەران دا مەشا دو رۆژایە. هیچ کەسەک ژ بەر مەترسییا گرێ ھەکاری گەلییێ زەندوورا بەرنادەت.

گرێ ھەکاری تەنێ ل هنداڤی سەرانسەری ئامێدیێ یە، ب ھەوایی 1 کیلۆمەترێ دوورە. ئانکو د مەسافەتا سیلەحی دایە. د ناڤبەرا چارچەلی -گرێ ھەکاری و زەندوورا دا، ھەرێما بەرواری بالا نێزیکی 200 گوندێن وێ ھەنە. ژ بەر ڤێ یەکێ ئەو ھەر دو دەڤەر ژ ھەڤ دوور و جوودا نە.

زەندوورا دکەڤیتە سەر سنۆرێ باکورێ کوردستانێ، دەڤەرا قەشوورا. ل باکور زەندوورا گوندێن باکورێ کوردستانێ یێن وەکی ئەلەموون، ئارووش و ئەکمال و گەرەمووس ھەنە. ل باشوورێ رۆژئاڤا رووبارێ خابوور و گوندێ نزدۆرێ جیدگریت . 2 کم دووری زەندوورا، زنارێ کێستەیە. پرسگرێک ب تەڤاھی ژ زنارێ کێستە دەست پێ دکەت.

پەکەکێ د رۆژا ئەول یا ئۆپەراسیۆنا (پەنجە-برووسک)یا ترکیایێ دا، د 24ێ نیسانێ دا زنارێ کێستێ بەردا. د 25 نیسانێ دا، لەشکەرێ ترکیا ل بلنداھیێن زنارێ کێستە خوە بجیھ کر. یەکینەیا زەندوورا وێ رۆژێ ئاسێ مابوو. ئەوان نکاری بچن باکورێ کوردستانێ، و گاڤا زنارێ کێستە ھاتیە گرتن، ئەو نەشیان بچنە وی ئالی ڤە ژی. یا راست ئەڤ یەکینە ژ 24ێ نیسانێ ڤە د ناڤا دۆرپێچێ دا ما بوون. ئەو د وان تونەلێن شەری یێن کو قەرەیلان گەلەک پەسنا وان د دا، دا ھاتبوونە دۆرپێچ کرن.

گەلۆ تۆنێلا شەری چیە؟

تۆنێلا شەری، کو ھەپەگە گەلەک جاران باسی وێ دکەت، خاپاندنەکا پەیڤانە. وەکو تاکتیکەکا نوو ھاتە دیتن و دهێتە گۆتن کو ئەو دێ ب ڤێ تەکتیکێ دەولەتا ترک ھلوەشینن. لێ بەلێ، یێن کو دبێژنێ تونێلا شەری بەرییا 30 سالان ژی ھەبوون. ئەو ژ بۆ خوە پاراستن و ڤەشارتنێ بکار دھاتن. ئەو نە ژ بۆ شەرکرنێ یە، ژ بۆ خوەپاراستنێ، ژ بۆ ژیانێ نە. ئەو تۆنێل ھەمبەر تەکنۆلۆژییا دژمنا یا پێشکەتی کو مرۆڤ خوە بپارێزیت تێنە چێکرن. ژ بەر ڤێ یەکێ، ھوون دکارن د تونەلەکێ دا ب ئەولهی بژین، لێ ھوون نکارن بپارێزن، ھوون نەکارن تێدا شەری بکەن. گاڤا کو تۆنێل کەشف بوو پێویستە مرۆڤ دەرکەڤیت.

ئەو نە تۆنێلا شەری بەلکو تۆنێلا مرنێ یە

پەکەکە دبێژیتێ تۆنێلا شەری، و د ئەنجامێ دا، ب دەھان جوان د ڤان تۆنێلێن شەری دا ھاتنە ئیمھا کرن. تەنێ د سالا 2017ێ دا، دو گەریلایێن ژن ل ھەرێما ئەرتووش (کەلا ئەرتوش) د تۆنێلێ دا ھاتنە هێلان و لەشکەرێن ترک د ڤێ تۆنێلێ گرتن، ئەڤ ھەر دو ژنە ب ساخی د تۆنێلێ دا مان. گەلەک بوویەرێن ب ڤی رەنگی چێبوونە. تەڤی ڤێ یەکێ ژی ھەپەگە و پەکەکە ب ئیسرارا خوە د تونێلێن شەری دا جوانان بجیهـ دکەت و ئەو تۆنێل ژ بۆی وان دنە گۆرێ وان. تەنێ  د سالا 2021ێ دا دەرگەهێن 5 تۆنێلێن شەری ل سەر دەھان گەریلایان ھاتنە گرتن و ئەو ب ساخی ما نە د وان تۆنێلان دا و ژییانا خوەژ دەست دان.

پەکەکە بۆچی ڤێ یەکێ دکەت؟

رووتینا ڤان چار سالێن داویێ یێن پەکەکێ ئەڤەیە؛ ب گۆتنا کو ھەر بھارێ گاڤا ئۆپەراسیۆن دەسپێ دکەن پەکەکە دبێژیت دژمن نکاریت گاڤەکێ پێش دا باڤێژیت، بەرخوەدانەکا مەزن ھەیە و ھتد… پرۆپاگاندایێ دکەت. لێ مخابن د پاییزێ دا دهێتە دیتن کو ھەموو ھەرێم کەتییە دەستێ دژمنی دا. دەولەتا ترک ب دەھان کم سنۆرێ خوە بەزاندییە.

پەکەکێ ئیسال ژی دەڤەرک دی رادەستی ئارتێشا ترک کر. و ئەو دێ پاییزێ ژی بێژیت مە گەلەک مەزن لبەرخوە دا، مە دژمن تێک بر لێ پەدەکێ نەهێلا ئەم دەولەتا ترک ژناڤ ببەین. ئەڤێ پرۆپاگاندایێ دکەن و دێ کەن ژی. ئانکو، ئارمانجا پەکەکێ ب ڤێ پرۆپاگاندایا ڤالا ڤەشارتنا لاوازبوونا خوە یا لەشکەری یە. لێ ئارمانجەکا دی ئەوە کو تۆڤێ نەیارییێ د ناڤ کوردان دا بچینیت. ب ڤێ یەکێ، ئەو کوردێن کو راستیێ نزانن دێ ژ ھێلا رووحی ڤە ژ رێڤەبریا سیاسییا فەرمی و مەشرووع یا کوردستانێ دوور کەڤن.

درەوا ھەپەگێ درەوەکا بچووک و ھێسان بوو. ب نەزان و خەشیم زانینا ھەر کەسەکێ، پەکەکە ھەول د دەت کو سەدەمێن شکەستنێن خوە باڤێژیتە سەر ھێزێن پێشمەرگێن کوردستانێ. لێ ئەڤ تەکتیکا پەکەکێ گەنی بوویە.